Lunglei in Swachh Survekshan State Award a dawng; Khawpui fai berah Indore thlan a ni

Ministry of Housing and Urban Affairs (MoHUA) buatsaih India ram puma khawpui fai inelna, Swachh Survekshan Award 2024-2025 chu nimin khan sem niin Mizoram atangin Lunglei chuan 'Promising Swachh Shehar Award' a dawng a ni.

India ram puma khawpui fai inelna, Swachh Survekshan Award 2024-2025 semna hi New Delhi-a Vigyan Bhawan-ah neih a ni a, Swachh Survekshan Award hi Swachh Bharat Mission-Urban (SBM-U) hnuaia inelna niin, he inelnaah hian India rama khawpui zawng zawngte chu tehfung hrang hrang hmangin an inel a. Tun tum hi Swachh Survekshan Award vawi 9-na niin khawpui len dan azirin inelna huang hrang hrang siam a ni a. Tun tumah hian Award chi hrang 78 sem chhuah a ni a, Lunglei chuan State Award pakhat, Mizoram khawpuite zinga faina kawnga hma hun eng ber lawmman, 'Promising Swachh Shehar Award' a dawng a. He Lawmman hi Mizoram sawrkara Urban Development & Poverty Alleviation (UD&PA) Minister K. Sapdanga hovin, Lunglei Municipal Council (LMC)-a Vice Chairman K. Lalrinawma leh Executive Councillor Lalhruaitluangi Sailo te, UD&PA Secretary Lalmalsawma Pachuau leh Director Jacob Lalawmpuia te'n Union Minister of Housing & Urban Affairs Manohar Lal-a kut atangin an dawng a ni.

Kum 2016-a Swachh Survekshan Award bul tan a nih atangin Lunglei khawpui chuan Aaward 6 a dawng tawh a. Tun tuma Award a dawn bakah hian kum 2019-ah 'Best City in Innovation and Best Practices in Northeast Zone'; Kum 2021-ah 'Best City in Citizen Feedback in North East Zone (Population 50 thousand - 1 lakh)'; Kum 2022-ah 'Clean City in North East Zone (Population 50 thousand - 1 lakh)'; Kum 2023-ah 'Clean City in North East Zone (Population 50 thousand - 1 lakh)' leh 'Clean City within Mizoram (Population below 1 lakh)' te a lo dawng tawh a ni.

Swachh Survekshan 2024–25 Awards semna ah hian Indore chuan a zawnin kum riatna atan India rama khawpui fai ber lawmman a la a, Surat chu pahnihna niin Navi Mumbai chu pathumna a ni a. Mipui nuai 3 atanga nuai 10 chenna khawpui Category-ah Noida chu khawpui fai berah puan a ni a, Chandigarh pahnihna niin Mysuru chu pathumna a ni bawk. Heng chawimawina te hi President Droupadi Murmu chuan hlanin sawrkar mi pawimawh dang te an tel bawk a ni.

Swachh Survekshan hi Ministry of Housing and Urban Affairs (MoHUA) buatsaih niin a vawi kuana a ni a, khawvela faina endikna lian ber niin khawpui chhunga Local body 4,500 chuang endik a ni a. A vaiin chawimawina 78 sem niin chung zingah chuan ‘Super Swachh League’ (SSL) pawh a tel a ni.