Aizawl-a MBSE Office Building thar hawngin Mizo tawng-a pawl 12 zirlaibu siam thar tlangzarh a ni

School Education Minister Dr. Vanlalthlana chuan nimin khan Aizawl-a Mizoram Board of School Education (MBSE) Building thar chu hawngin Mizo Tawng-a buatsaih pawl 12 zirlaibu- Physics, Chemistry, Biology leh Mathematics te chu a tlangzarh nghal bawk.

Hemi puala nimin-a hun hman ah School Education Minister Dr. Vanlalthlana chuan MBSE building thar luah theih a sak zawh a ni chu lawmawm a tih thu sawiin, New Education Policy 2020-in a beisei anga zirlaibu engemaw zat Mizo tawng-a buatsaih a nih tawh bakah Pawl 12 Science leh Mathematics zirlaibu hman tur, Mizo tawnga buatsaih tlangzarh lehna chuan Mizoram chhunga zirna in hmasawnna a hmuh phah ngei a beisei thu a sawi a. NCERT hnuaia zirna dinhmun endikna pakhat, Performance Assessment, Review and Analysis of Knowledge for Holistic Development (PARAKH) hmanga Mizoram School engemaw zat endiknaah dinhmun duhawm loh taka ding anga kan lan mek laiin, zirna In sang zawk, College leh University-te erawh National Assessment and Accreditation Council (NAAC) endikna ah hmahruaitu zingah an tel zel thung tih a sawi a. He inthlauhna hi zirchianga, ruahmanna siam a nih theihna turin NITI Aayog-ah thlen a nih thu a sawi bawk.

Education Minister chuan Sap tawng leh tawng dang hrang hrang thiam a pawimawh rualin mahni pianpui tawng hlamchhiah phah nana hman erawh chu hnam anga boralna thlentu a nih theih thu a sawi a. Mizo tawng ngei a zirlai lehkhabu buatsaihna chuan zirna kawnga hmasawnna thlentu a nih a beisei bakah hnam humhalhna kawnga hmanraw pawimawh tak a nih a beisei thu a sawi bawk a. Zirlai syllabus tha tak tak duan ni mahse, Zirtirtute zawhna siam (question set) danin a zir loh chuan zirlai naupang ten thiamna tluantling an neih loh theih thu sawiin, hemi kawngah hian School Education Department-a thawktute chu tan la zel turin a fuih bawk.

Nimin-a hawn tak MBSE Building thar hi NEDP Scheme hnuaia cheng nuai 1,000 hmang a sak a ni a. February 18, 2021 khan building sak hna hi tan niin December 13, 2024 khan peihfel a ni a. April 22, 2025 khan MBSE kutah hlan a ni. Building hi chhawng 7-a sang a ni a, thawktute Room hrang hrang bakah Record Room, Library cum Research Room, Tabulation & Evaluation Hall, Strong Room, Store Room Conference Hall leh mi 30 chuan theihna Elevator-a awm bawk a ni.

MBSE hmalakna hnuaiah hian Pawl 10 Maths leh Science Subject lehkhabu te chu a hmasa ber atan tihchhuah a lo ni tawh a, Nov. 30, 2022 khan tihchhuah niin Pawl 9 Maths leh Science lehkhabu chu Feb. 6, 2023 khan tihchhuah leh a ni a. Pawl 9 leh 10 lehkhabute hi MBSE in copyright a neih textbook an nih avangin Translation type-a buatsaih a ni a. Pawl 11 leh 12 erawh chu copyright te a awm theih avangin translation ni tawh lovin, textbook writers-ten reference material engemaw zat nen tangkawpa anmahni irawma an buatsaih a ni thung a. Pawl 11 Physics, Chemistry, Biology leh Mathematics textbook-te chu June 28, 2024 khan tlangzarh niin tun tumah hian Pawl 12 zirlaibu Physics, Chemistry, Biology leh Mathematics te tlangzarh leh a ni a, lehkhabute hi vaiin copy 700 theuh chhut tir a ni a. Physics zirlaibu hi phek 493 niin Rs. 300 man a ni a, Chemistry hi phek 550 niin Rs. 350 man a ni a. Biology hi phek 331 a chhah niin Rs. 250 man a ni a, Mathematics hi phek 329 niin Rs. 250 man a ni bawk.

Nimin-a he hun hman hi MBSE Chairman JH. Zoremthanga chuan kaihruaiin T. Lalhlimpuia MLA leh School Education Department-a Special Secretary David Lalthantluanga te pawhin thu an sawi a, MBSE hmalakna te tarlan a ni bawk.