BJP in an la hre ngai lo tih sawi

BJP Mizoram chuan Autonomous District Council chungchanga Governor thuthlukna chu State Cabinet Minister lo ni tawh ten Press Conference meuh kova an sawisel an la hre ngai lo tih an sawi.

Nimin-a Aizawl Press Club-a thuthar thehdarhtute a kawmna ah BJP National Minority Morcha Secretary Delson Notlia, MDC chuan Chakma Autonomous District Council (CADC) Governor's Rule-a dah chungchanga Home Minister K. Sapdanga’n Larsap thutlukna demna thu a sawi chungchangah Governor thuthlukna chu zahawm an tih thu sawiin, CADC huamchhunga Civil Society Organisation te duhdan ang thlapa kalpui a ni chu mipui zahna dik taka an ngaih thu a sawi a, CADC mipuite ngenna angin Inquiry Commission din se, sawrkar kalta a eirute leh thil diklo ti zawng zawngte chhuitir a, a mawhphurtu te chu dan anga hrem ngei ni se an duh tih a sawi bawk.

Delson Notlia chuan CADC chu India rama Autonomous District Council 10 zingah a buai zing bik hle tih sawiin, CEM an thlak zin bakah eirukna leh sum indaihlohna a nasat avangin Financial Emergency hial puan a ngai a, hei vang hian CADC-a tlawmngai pawl lian pathum- Young Chakma Association (YCA), Mizoram Chakma Student's Union (MCSU) leh Chakma Mahila Samiti (CMS) te chuan inthurualin, Governor hnenah CADC kal dan tha an tih loh avangin CADC thiata, an tih dik lohte chhui turin an ngen niin a sawi a. Governor chuan CADC dinhmun chu uluk taka a en hnuah a enkawlna hnuaia awm tul a tih avangin India Constitution in thuneihna a pek angin July ni 7 khan Governor’s Rule ah thla 6 chhung a dah niin a sawi a. MNF leh Congress sawrkar lai pawhin Governor lo awm tawh te chuan ADC te chungchangah thutlukna an lo siam fo tawh thin bakah Governor demna thu sawi chu Mizoram-ah a la thleng ngai lo niin a sawi bawk.