BJP ten NH-06 kawng dinhmun an enfiah

Mizoram chakkhai lakluhna kawng pawimawh ber Sairang leh Khamrang inkar, NH-06 kawng chhia chu Inrinni khan BJP Mizoram hruaituten a hmunah an enfiah.

BJP Mizoram State President, Dr. K. Beichhua MLA chuan NH-06 kawng-a NHIDCL-in an enkawl chu tun dinhmunah zia awm deuha ngaih theih a nih thu sawiin, Mizoram PWD enkawl lai Kilometre 40 erawh a that loh hle rualin, Truck Owner Association leh pawl hrang hrang ten nasa taka hma an la chung pawhin kawng dinhmun hi a la chhe hle a, ruah a sur a nih chuan lirthei eng chi mah kal ngaihna awm lo khawpin a chhiat thu a sawi a. Helai kawng, hun rei tak Mizoram Sawrkar in a lo enkawl Kilometre 40 chu Mizoram Sawrkar leh NHIDCL te chuan July ni 7-ah Joint Survey an nei ang a, chumi hnuah NHIDCL te kut a hlan tum a ni.

Dr. K. Beichhua chuan he kawng pawimawh tak chungchangah hian NHIDCL te hnenah theihtawp chhuaha hma la tur leh harsatna an nei a nih chuan a tul anga BJP Mizoram Headquarters te hnena thlen turin a chah a. Sawrkar tih mualpho emaw, intihlar emaw tum avanga he kawng hi tlawh leh enfiah an nih loh thu sawiin, kan kawng pawimawh ber chhiat dan leh a siam thatna kawnga hmalak theihna an neih an beisei avang leh mipui harsatna sutkian an tum vang chauha tlawh an nih thu a sawi bawk.