YMA Day thuchah
YMA Day thuchah
Sd/- KAWLTHUAMA,
President,
YMA a ka Memberpui zawng zawng te, YMA Day vawi 90-na lawmna chibai ka buk vek a che u.
Mizo ten pawl ropui leh hlu tak kan neih YMA chuan kum 90 hmel a lo hmu ta. Mizoten YMA kan nei hi kan vannei a, Pathianin Mizo zawng zawngte huapzo pawl ropui leh tha min pe hi lawmthu i sawi mawlh mawlh ang u.
Vawiin-ah hian YMA chu Politics rawng kailo, tanpui ngaite tanpui thintu kan nihna hre thar leh ila. Mi harsa leh rethei pawh thliar lo leh rethei leh pachhia te tanpui thintu pawh kan nihna hi vawng nung zel ila. Mizo thalai tawh phawt chu YMA member ni ila, tanpui ngaite tanpui thintu YMA a kan tel thei hi i lawm ang u. Mizote thinlung-a YMA hlutna ti ropuitu leh ti zahawmtu ber tanpui ngaite tanpui hi hlamchhiah lovin chawi nung zel ila.
YMA member chu thudik tan leh ngaina, mi hawihawm, tlawmngai, ram, khawtlang leh veng tana thatna tur ngaihtuah mi, ruihtheih thila insumthei mi a ni tur a ni.
Tunlai hunah aia upa zahna kawngah pi leh pute hunlai kan pha ta lo deuh niin a lang a, aia upa zawk te zah kawngah tan i la thar leh teh ang u. Hla in a lo sawi angin, ’Aia upa te zah thiamin, an thu awihin zawm fo rawh. Aia u te tirh an hnial ngailo, Ruai thehna ah Aia u te an bar khalh ngailo,’ tih thu te hi i hre thar leh ang u. Tunlai thangtharte zingah aia u zawk te a dik a dawk pawh thlu lova hnial pawng pawng kan tam ta hle mai. Puipun nikhuaah aia u te thutna ken nachang pawh kan hre ta meuh lo a ni e. YMA member zawng zawng ten aia upa zah thiam turin tan i la thar leh teh ang u.
A tawp berah chuan YMA chu – 1) In kang, ram kang a awm a, thelhtu 2) Mizo zawn ngai a awm a, zawngtu 3) Tuitla an awm a, zawngtu a ni.
Thangthar khawvelah hian YMA hlutna hi hre thar leh ila, thian chhan thih ngam YMA member i ni zel teh ang u.
YMA vul zel rawh se.