P&E Department Corporate-a kalpui sawiho

Power Minister F. Rodingliana chuan inrelbawlna tha zawk a awm theih nana P&E Department Corporate-a kalpui chu ZPM Sawrkar Manisfesto zinga mi a nih thu sawiin, hei hian mipui leh sawrkar tan kalphung tha zawk a thlen dawn a ni, a ti.

Niminpiah khan Power Minister Pisa-ah P&E Department ‘Corporatization’ chungchang ngaihtuaha Department hotute nen an thutkhawmna ah Power Minister chuan, Corporate ni tura P&E Department hmalakna chu chak taka bawhzui turin Department Officer te a chah a, Ministry of Power in State Power Department Corporatize dan tur inkaihhruaina a siam te thlirho niin hemi zulzui hian a kalpui dan tur ruahmanna siam a ni.

Ruahmanna ang chuan Unbundling tih hmasak tur niin P&E Department chu tuang thum – Generation, Transmission leh Distribution-ah te thenhran tur a ni a, heng Strategic Business Unit hrang hrang te hian anmahni chanpual theuh enkawl in an thawk tawh dawn a, hemi mil hian Department siksawi tura rel a ni a, a theih ang angin pawn lama hna semchhuah chu nasa zawk a kalpui nghal tum a ni a. Hei hian Department chhunga thuang thum te chu nasa zawkin an hna theuhah an insawrbing thei anga, inrelbawlna tha zawk neiin mipuite tan service tha zawka hnathawk thei tura ngaih a nih bakah Power bo thlau pawh tlahniam thei tura beisei a ni.