THISEN PEK RAWNGBAWLNA

THISEN PEK RAWNGBAWLNA

- T. Biakchamliana, Secretary,

AVBD Serchhip Branch

Vawiin June ni 14 hi khawvel puma midang tana a thlawn liau liau a thisen pe a, midangte nun pawtsei thin tute puala hun hman ni, ‘Blood Donor’s Day’ a ni a,kum tin he ni hi khawvel pumah hman thin a ni. World Blood Donor’s Day hi WHO in khawvel puma mipui hriselna kawnga inzirtirna ni pawimawh a ruahman 11 zingah a tel a, World Blood Donor Day hi Nobel Price dawngtu Karl Landsteiner, Blood Group A, B, O hmuchhuaktu piancham ah hman thin a ni. Kumin thupui chu, ‘Give Blood, Give Hope, Together we can save lives’ tih niin, natna avanga beisei nei tawhlo te tana thisen pe-a an nun hlu tak chhanchhuah hi mitin tih theih hlu ber a ni.

Damlo mangangte tana a thlawn a thisen pe thinte hi an hlu em em a, kan ngaihhlut deuh deuh pawh a tha hle mai. Khawvel thiamna hi sang tawh viau mahse, mihring thisen hi siamchhuah theih a ni lo a, Pathian siam liau liau a nih avangin mihring dam khawchhuah nan a aia hlu hi a tam lo viau ang.

Tunhma kum tam vak lo liamta vel khan Branch YMA hminga a mamawhte tan thisen pek thin a ni a, damlo thisen mamawh an awm in vantlang hriat ah au-in mi tlawmngai ten Damdawi In kan pan thin a nih kha. Tunah chuan District Hospital tinah Blood Bank te neiin Association for Voluntary Blood Donation (AVBD) din a ni a, anni hian damlo thisen mamawh ten an mamawh hun a thisen an hmuh theihna tur leh Blood Bank-a a awm reng theih nan tlawmngai a thisen pe thei turte dawr in ruahmanna felfai takin thisen pek hun an siam a, Blood Bank leh thawktu lam tan a zangkhai in a awlsam hle a ni.

Tunhnaiah hian Mizoram puma Kohhran thalai pawlte hian Thisen pek hmangin rawngbawlna an kalpui nasa hle a, a ropui in a va Kristian tehlul em. Nikum April 2024 - March 2025 chhung khan AVBD Serchhip Branch leh Blood Bank chuan Blood Donation Camp vawi 36 an nei a, thisen Unit 646 lak a ni a, Donation Camp vawi 22 chu Kohhran Thalai te (KTP, TKP, PYD, SAY etc) pek niin Sikul leh College NSS leh Club atangin vawi 11 DoCation camp neih a ni a, sawrkar Office Staff ten an Office hmingin Donation Camp vawi 3 an nei bawk. Tin, kumin April atanga nimin thleng khan Blood Donation Camp hi vawi 10 chuang zet neih a ni leh tawh bawk. Hmun hla takah Missionary in thlarau bo zawngin kan kal vek thei lo a, kan bulhnai ah Zu leh ruihhlo in a tihbuai mi tam tak, natna in a chiahpiah tlat, an taksa boral rual a an thlarau boral ve mai tur tam tak te nun chhanhimin, nun bul tan tha a chhandam an nih theihna turin kan thalai rual hian an nunna an thisen hlu tak hmangin an chhanchhuak a ni, hetiang bak a rawngbawlna ropui hi a awm chuang bik dawn em ni le.

Tin, mi engemawzat in an piancham leh engemaw lawmawm an tawnin a hriatreng nan emaw, a lawm nan midang tan Thisen pe turin Blood Bank an pan thin, a ropui in intihhmuh chi a van ni em. Kan zirlai rualte zingah NSS, NCC leh Club hrang hrangte hi Serchhip District Hospital Blood Bank-ah thisen dahkhawl a awm tlem ta tih an hriat chuan sikul kal lai leh chawlh lai pawhin thisen pe turin engtik lai pawh in an inring a ni ber e. Khaw dang chanchin ka hrelo, Serchhip kan vanneih na a ni.

Hetihlai hian mi thenkhat chuan Blood Bank lama thisen a awm loh thut pawhin ‘AVBD an awm alawm’ kan lo ti mai thin. AVBD hi damlo thisen pe tur nilo in damlo ten an mamwh hun a thisen an hman tur Blood Bank a chatlak lova a awm reng theihna tura thisen pe thei tur zawng tura tlawmngaihna tak tak nena hlawh leh hamthatna beisei lo a inpe te an ni a, nang leh kei thisen pe thei tura hrisel kan awm loh chuan he pawl hian awmzia a nei lo a, tih theih a nei tlem em em a ni. Tin, thisen pe thin kan nih phawt chuan AVBD member kan ni tih hi i hre hhar leh ang u.

Blood Bank a thisen pek lo hlut zia leh a tul zia hi mi hausa leh hrisel tha chuan kan hre tawklo thei viau awm e, lei ngai pawh nise mi hausa chu an buai lo. Damlo leh miharsa te bawk hian a hlut zia an hre leh thin a, a thlawna thisen kan pek hian keini aia harsa zawkte tan rawng kan bawl a lo ni. Tin, tunlai hian thalai hrisel hmel tak thisen pe thei lo kan awm ta fo mai, kan nun uluk a tul hle mai.

Vawiin June ni 14, World Blood Donor's Day ah hian midang, a manawh te tana thisen lo pe tawh zawng zawngte, zahna chibai ka buk thar leh che u a, a thisen hlu tak hmanga min chhandamtu Isua rawngbawlna chhunzawmtu ni zel turin hriselna tha nen dam reng ang che u.