Sawhthing hralhchhuah ah harsatna thlen phah

India leh Pakistan inkar boruak a chhiat avanga Bangladesh ramri khar chuan Mizoram sawrkar Sawhthing hralhchhuah a nghawng mek.

Akashvani Aizawl zawhna chhangin, Mizoram atanga Sawhthing thawnchhuah lam buaipuitu, Starfarm CEO Malsawmi chuan Bangladesh chu India atanga Sawhthing leichhawngtu lian ber a ni tih a sawi a. India leh Pakistan inkar boruak a chhiat avanga Bangladesh-in ramri a khar nghal avangin India ram chhung hmun hrang hranga Sawhthing tharchhuah an chhekkhawl sa te chu a inhnawhkhawm vek a, hei hian Mizoram atangin ramchhung khawpui lian hrang hrangah te Sawhthing an hralh theih loh phah niin a sawi a, India leh Bangladesh ramri khar hnuah Sawhthing man a tlahniam char char tih sawiin, tun dinhmunah Delhi Mandi-ah chuan Sawhthing kg 1-ah Rs. 28 vel a ni mek a, Mizoram in a hralhna Silchar leh Siliguri-ah te chuan kg-ah Rs. 17 velah a tlahniam tawh niin a sawi. 

Malsawmi chuan ram chhunga Sawhthing man tlahniam ta lutuk chu Mizoram pawhin a tuar nasa chho zel nia a hriat thu sawiin, loneitute leh Mizoram sawrkar Support Price thlengin a nghawng vek niin a sawi a, Kumin February ni 20 atanga Mizoram sawrkar Sawhthing lei thawh khatnaa Sawhthing te chu hralh zawh loh tlem te chauh a awm tawh a. April ni 21 atanga Sawhthing lei thawh hnihna erawh chu ruahsur vang leh India leh Pakistan indo avanga ramri khar avangin thawnchhuah lamah harsatna an tawk chhoh mek thu a sawi a ni.