Pension dil sawrkar hnathawk pahnih awm tawh

Mizoram-a sawrkar hnathawk zingah ‘Mizoram Special Voluntary Retirement Scheme 2024’ hmanga pension dil mi pahnih an awm tawh.

Mizoram sawrkarin pension dan a siam thar chungchangah hian Finance Department hotute chuan, Pension dan thar hmanga Pension dil mi pahnih an awm tawh thu an sawi a, heng mite hi School Education Department leh AH&Vety Department-a thawk an ni a. Pension diltu pakhat chu Cancer a ni a, pakhat chuan a pension a dilnaah an chhungkaw dinhmun vang a nih thu a tarlang thung a ni. Finance Department hotute sawi dan chuan, pension dan thar hmanga pension dilna chu an enfiah tawh a, an pahnih hian pawmsak ve ve an ni tawh bawk.

Tarlan tawh thin angin, Mizoram-ah sawrkar hnathawk aikal lâk khap a nih tâk avangin sawrkar chuan sawrkar hnathawk, chhan hrang hrang avanga an hna chhunzawm thei tawh lo te tan Mizoram Special Voluntary Retirement Scheme, 2024 a siam a. Hemi hmang hian sawrkar hnathawk nghet, Voluntary Pension-a chhuak tura an hnathawh (service) hun chhungin la pha si lo, hna thawk chhunzawm thei tawh si lote'n Voluntary Pension an dil thei a ni.