Rajya Sabha MP hlui Ronald Sapa Tlau a boral

Mizoram Rajya Sabha MP hlui Ronald Sapa Tlau chu nimin zing dar 8:00 khan New Delhi-a AIIMS-ah Lung tha lo avangin a thi a, kum 71 a ni.

Aizawl Zonuam Veng-a cheng leh MPCC-a Vice President nilai Ronald Sapa Tlau hi Lung tha lo avangin AIIMS-ah hian zai a ni a, hlawhtling taka zai ni mahse a taksa in a tlin loh avangin nimin, April 30, 2025 zing dar 8:00 khan a boral a, Vawiin hian a ruang hi Aizawl rawn thlenpui beisei niin lumen tur a ni anga, naktuk Zirtawpni ah vuiliam tura ruahman a ni. Ronald Sapa Tlau hi Serchhip District-a Hualtu khua a piang a ni a, kum 2014 July thla khan Indian National Congress (INC) Ticket in Rajya Sabha MP-ah thlantlin a ni a, kum 2020 July thleng Rajya Sabha MP niin Party-ah pawh chanvo hrang hrang a lo chelh tawh thin a, tunah hian Mizoram Pradesh Congress Committee-ah Vice President a ni mek bawk a ni.

Larsap General (Rtd) Vijay Kumar Singh chuan Ronald Sapa Tlau chu uiawm a tih thu leh khawhar chhungte a tawrhpui thu Social Media kaltlangin a tarlang a. Chief Minister Lalduhoma pawhin ram tana an thawhpui leh a thian tha Ronald Sapa Tlau chu an ui takzet tih sawiin, Mizoram Pradesh Congress Committee chuan hun lo taka an Vice President in a boral san chu an ui takzet tih an sawi a. MPCC President Lal Thanzara chuan Ronald Sapa Tlau thihna chuan Congress party nasa zawka ram leh hnam tana rim taka thawk turin a tihchak thar ngei a beisei thu a sawi bawk.