NCST Full Commission in Review Meeting neihpui

Mizoram-a rawn zin National Commission for Scheduled Tribes (NCST) Full Commission chuan Mizoram Sawrkar hotulu te chu nimin khan Secretariat Conference Hall-ah Mizoram-a Scheduled Tribe te dinhmun, an dikna leh chanvo leh an tana Scheme hrang hrang hnuaia hmalakna te thlirin Review Meeting an neihpui.

He hunah hian NCST hi an Chairperson Antar Singh Arya hovin Member awm zawng zawng mi 3 – Nirupam Chakma, Dr. Asha Lakra leh Jatothu Hussain te telin Mizoram Sawrkar hotulu te chu Chief Secretary Khilli Ram Meena leh DGP Anil Shukla ten an ho a, Antar Singh Arya chuan Mizoram-a Hindi zir leh ngaihpawimawh tul nia a hriat thu te sawilangin, Mizoram Hindi Medium School hawn dawn kawng zawn nise tiin a duh thu a sawi a. Tlangram loneih dan bansan nan Project siam nise tiin rawtna a siam bawk. Mizoram Sawrkar hotulu kalkhawmte chu anmahni pawh Tribal an nih vek avangin an Tribal leh hnampuite hmasawnna atana theihtawp chhuah turin a fuih a ni.

NCST Member Nirupam Chakma chuan ST te dinhmun chawikan nana NCST mawhphurna leh thuneihna a neih dan te sawiin, Mizoram mipuiin zinga NCST hnathawh dan leh ST te tana hma an lak theih hria an tam lo nia a hmuh thute a sawi a. Hemi kawngah hian tan lakna tur a awm niin a sawi lang bawk. Dr. Asha Lakra chuan zirna leh hriselna kaihhnawih chungchanga thil a hmuh dante thil tha tih thei nia a hriatte a sawilang a ni.

He hunah hian Chief Secretary Khilli Ram Meena chuan Mizoram a cheng za zelah 94.45 chu Scheduled Tribes an nih avangin Sawrkar programme zawng zawng chu ST te hamthatna tan zel a ni thu sawilangin, Mizoram Sawrkar hmalakna hrang hrang te a tarlang a. NCST in thu an zawhna chhanna nihpah fawmin Planning & Programme Implementation Secretary, Tribal Affairs enkawltu ni bawk Lalmalsawma Pachuau chuan presentation hmangin ST te hamthatna leh hmasawnna atan Mizoram Sawrkar hmalakna leh scheme hrang hrang hnuaia dinhmun leh NCST in thil hrang hrang an hriat duhte te a sawi a. NCST Secretary Puneet Kumar Goel chuan Mizoram Sawrkrin chhana pek te chungchang sawiin, Commission in information hrang hrang an duh belh te a tarlang bawk.

NCST hian Official te Meeting an neihpui zawh veleh Press Conference an nei chhunzawm a. He hunah hian ADC 3 – CADC, MADC leh LADC te an tlawh thu te, heng ADC huamchhunga sawrkar hmalakna an zirchianna chungchang te Chanchinbumite hmaah hian an sawi a. Hemi hnu hian MINECO a Smart City hnathawh mek, Urban Landscape & Avenue Plantation, ‘Aizawl Sumtual’ an tih bawkah ‘Ek Ped Maa ke Naam’ Campaign bawhzuiin thingtiak an phun nghal bawk.