Mizoram-ah Autism Acceptance Month kharna Larsap hovin nimin khan hman a ni
Spastic Society of Mizoram buatsaih, 'World Autism Acceptance Month' kharna hun chu nimin khan Gilead Special School, Bawngkawn Brigade Veng-ah neih a ni a, he hun hi Larsap General (Dr) Vijay Kumar Singh chuan khuallian niin a hmanpui a ni.
Larsap, General (Dr) Vijay Kumar Singh chuan Spastic Society of Mizoram din a nih chhoh dan leh an chanchin bakah khawtlang tana an rawngbawlnate chu ropui a tih thu he hunah hian sawiin, Pathian in vohbik ni tura a siamte'n thiamna leh theihna danglam bik an nei theuh tih a sawi a, “Vawiin-a hmuh theiha an rawn pholang hi a nemnghehna a ni,” a ti. Spastic Society of Mizoram hotute, Gilead Special School-a thawktute leh anmahni tawiawmtu nu leh pate inpekna leh dawhtheihna chu ngaihsanawm a tih thu Larsap chuan sawiin, vohbik nu leh pa te chu Pathian in mi danglam bikte enkawl tura a bik taka a thlanchhuahte an nih thu a sawi a. Vohbik naupangte tan Sawrkarin theihtawp a chhuah thu pawh a sawi bawk.'World Autism Acceptance Month' hi United Nations ruahmanna in kum 2007 atang khan hman tan a ni a. Autism chungchanga hriat tur pawimawhte, a veite hriatthiamna leh tawiawm a tulzia inzirtir thin a ni a. Autism Spectrum Disorder (ASD) neite leh an chhungte harsatna tawh chungchang inhrilhhriat bakah, khawtlang anga tawiawm tulna te inzirtir nana hman a ni a. Hemi pual hian April ni 2, 2025 atang khan hun hman a lo ni tawh a ni.
Spastic Society of Mizoram hi kum 1989 April thla khan Society for Rehabilitation of Spastic Children ti a din niin, kum 2005 khan Spastic Society of Mizoram ti a thlak a ni a. Gilead Special School for Multihandicapped Children, tuna Gilead Special School ni ta hi April ni 10, 1990 khan din a ni a. Tun dinhmunah vohbik zirlai 135 enkawl mekin, heng zinga 30 chuangte hi Autism Spectrum Disorder (ASD) nei naupang te an ni. Hmunhma an neih zau tawk loh avangin an duh angin zirlai an la thei lo tih pawh sawiin, Hosteller 32 an nei a, avaiin thawktu mi 50 bawr vel an nei mek a. Zirna pangngai bakah Vocational Training Centre leh Adult Recreational Centre-te an kalpui bawk a ni.