National Technology Day pualin hun hman a ni

Nimin khan Aizawl-ah ‘National Technology Day’ pualin hun hman a ni.

May 11, 1998 khan Rajasthan-a hmun pakhat Pokhran-ah hlawhtling takin India ramin nuclear test a neih avangin khawvela nuclear tha chakna hmang thiam leh ralthuam nei ram tlêmte zingah a tel a. He ni chhinchhiah tlâk tak hriatrengna atan hian kumtin May 11 chu ‘National Technology Day’ atan hman zui a ni ta a ni. Kumin hian National Science Day hi Pathianni-ah a tlak avangin Mizoram-ah chuan nimin khan he ni pual hian hun hman a ni. Directorate of Science & Technology, Govt. of Mizoram bultuma Innovation Facility Centre, Aizawl-a he ni puala hun hman hi Planning & Programme Implementation Department Addl. Secretary Irene Zohlimpuii Pachuau chuan hmanpuiin tunhma chuan India hi Science leh Technology-ah a hnufum thei em em tih sawiin, ram dangte khawl siamsa a lei nasa thin a ni, a ti a. Amaherawhchu kum 1999 atanga Vawiin thlenga India-in Science leh Technology lama hma a sawn chak zia te a hmutu leh hmangtu kan ni chu kan vannei tih sawin, “Technology hian min hual vek tawh a, Smart Phone kaltlangin thil tam tak kan ti thei a, online-in kan bazar a, dating apps te pawh kan hmang tangkai ta hle a, hnathawhna ah te, indonaah te, IT lamah te pawh technology hi a tangkai em em a ni,” tiin Zirlaitete chu ngun leh chîk taka thil ngaihtuah thin a, hmasawn tum ngei turin a fuih bawk a ni.

He hun hi Chief Scientific Officer Er. H. Lalsawmliana chuan kaihruaiin Mizoramin Science & Technology hman tangkaina hrang hranga hma a sawn dan chanchin ngaihthlak a ni a, thusawi dang hrang hrangte ngaihthlak a ni bawk.