HSSLC leh HSLC Exam 2025-a Toper te hnenah Chief Minister's Award 2025 hlanna neih a ni

Mizoram Board of School Education (MBSE) in kumin a Higher Secondary School Leaving Certificate (HSSLC) leh High School Leaving Certificate (HSLC) Exam a buatsaih a Topper te chawimawina, Chief Minister's Award hlanna chu nimin khan neih a ni.

School Education Department buatsaih-a Aizawl Vanapa Hall-a ‘Chief Minister's Award 2025’ hlanna hunah hian Chief Minister Lalduhoma chuan Chief Minister's Awar chua sawrkarin MBSE Exam pahniha Topper te an ngaihhlutzia leh an kalzelna tura an duhsakzia tihlanna a ni tih sawiin, “CM Award hi huang dangah pawh kan sem zel dawn,” a ti a. Ramin Resources a neih ropui ber chu Human Resource a ni tih sawiin, “Natural Resource lamah hausa mah ila mipuiten kan zir loh chuan kan chhawr tak tak thei chuang lo. Chutih laiin ram mipuite an fin var a, hriatna leh thiamna lama an san chuan Natural Resource nei tha vak lo mah se ram dang atanga Raw Material-te lalutin ram hausa takah an indin chhuak thei tho thin,” a ti.

Mizoram hi ziak leh chhiar thiam tamna State kan nih thu leh Report thar ber lo chhuak turah pawh India rama ziak leh chhiar thiam tamna ber State kan ni dawn nia hriat a nih thu Chief Minister chuan sawiin, “Ziak leh chhiar thiam tamna ber State, chhawr tlak lehkhathiam tlemna ni si kan ni ang tih a hlauhawm a, chhawr tlak ngei nih i tum ang u,” a ti a. Zirna sang zawk lamah thalaite an kal nasat a tul thu te, Zirna lamah sawrkarin ngaihtuahna a seng nasat thu leh sum leh pai dinhmun mila kal a ngaih thu te sawiin, Zirlaite chu Social Media hman lamah fimkhur turin a chah a. “Hlawhtlinna leh hmasawnna hi ‘Click chhuah’ a ni lova ‘Thawh chhuah’ zawk a ni. Mi hlawhtling ni tura i mamawh dik tak, i tih tur dik tak chu lehkha zir kha a ni a, chu kawng chu huai takin lo zawh ang che,” a ti bawk.

Chief Minister's Award hi HSSLC Exam-a Topper- Science-ah Cynthia Lalhlupuii Shangpliang; Commerce-ah Kristin Laldinpuii Ralte leh Arts-ah Lalrammawii Tochhawng bakah HSLC-a Topper PC. Lalthakimi te hnenah hlan niin Tangkafai Rs. 50,000/-, Memento leh Citation hlan an ni a. Kumin hi tum 15 an semna niin Education Minister Dr. Vanlalthlana chuan he hun hi khual zahawm niin a hmanpui bawk a ni.