MZP ten Total Bandh neih tum an thulh

MZP Headquarters, Lunglei ten Aizawl-Thenzawl-Lunglei (ATL) Road siamna sum pawhpen nia an hriat dahlet tura sawrkar an phutna chu sawrkarin tihhlawhtlin a tum avangin Vawiin-a Total Bandh huaihawt an tum chu thulh a ni.

Nimin-a Lunglei MZP hruaitute leh Lunglei MLA thenkhatte inbiak hnuah sawrkar chuan Pukpui atanga Mausen inkar kawng siam nana pawisa a dahsa tawh bakah cheng vbc. 58.99 dah belh a tum thu hriattir an nih hnuah leh a daih lohna pawh dah belh zel tum a nih thu document nen an inpek avangin MZP te hian an lo ruahman lawk tawh anga Vawiin-a Total Bandh huaihawt an tum chu an thulh tih an puang a ni.

Tarlan tawh thin angin Lunglei MZP te hian Aizawl-Thenzawl-Lunglei kawng siamna tur sum pawhpek nia an hriat dahleh phut hian tunkar Thawhtanni atang khan Pukpui daiah kawng an dang a, nizan hmasa khan kawng dan an tihtawp hnuah, Vawiin hian Total Bandh huaihawt an rel a, sawrkar nen an inbiakrem tak avangin an thil tum hi an thulh ta a ni.