Serchhip Sub-Hqrs. YMA in Ruihhlo do kawngah Branch tin ten nasa zawka hmalak an rel

Serchhip Sub-Hqrs. YMA chuan nimin khan Rorel Inkhawm vawi 5-na hmangin Ruihhlo do kawngah Branch tin ten nasa zawka hmalak an rel bakah ruihhlo chi hrang hrang manchhuah kawnga Mizoram Police, Excise & Narcotics Department leh YMA te hmalakna chu chhuanawm an tiin lawmawm an tih thu an sawi.

YMA Sub-Hqrs. ten Inkhawmpui neih loh kum-a an neih thin, Sub-hqrs. YMA Rorel Inkhawm Serchhip Auditorium-a neih hi Serchhip Sub-Hqrs. YMA President Kawlthuama chuan kaihruaiin YMA Khawih Agenda an rel zingah ‘Ruihhlo do kawngah Sub-Headquarters YMA hnuaia Branch tin ten nasa zawk a hmalak ni rawh se’ tih chu lungrual takin an pass a, ‘Aia upa zah kawngah YMA member ten hma kan sawn zel theih nan Sub-Headquarters YMA in hma la rawh’ tih leh ‘YMA Chhang pualin Mizo Hnam Lam leh Infiamna Kutpui Sub-Headquarters YMA in buatsaih rawh se’ tih te pawh lungrual takin an pawm a. Sawrkar Khawih Agenda an pawm zingah ‘Industrial Training Institute (ITI) Bukpui hi mumal taka a function theih nan Sub-Headquarters YMA in hmala rawh se’ tih leh ‘Thenzawl to Zote South inkar kawng PCC chhun tawh hi Alkatra (Bitumen) hmanga metal (Seal Coat) a nih theih nan hmalak ni rawh se’ tih te chu an pawm a. Hei bakah hian ‘Mizo thalaite nun rawng tak leh diriam taka suat thintu Heroin No. 4 leh ruihhlo chi hrang hrang manchhuah kawnga Mizoram Police, Excise & Narcotics Department leh YMA te hmalakna hi chhuanawm kan tiin lawmawm kan ti hle a. Sum thianghlim lo lakluh kawngah leh ruihhlo tawlhruk kawngah mi hausa tam tak an inrawlh thin hi Sub-Headquarters YMA Serchhip chuan a dem tak meuh meuh a, thuneituten an phutawk hremna an chungah kengkawh ngei se kan ti’ tiin Resolution an pass bakah kum 2025-2026 Budget atan Rs. 13,41,850/- chu pawm a ni bawk.

Serchhip Sub-Hqrs. YMA Rorel Inkhawm-ah hian Report hrang hrang ngaihthlak niin kum 2024-a Rorel Inkhawm leh kumin Rorel Inkhawm inkara YMA Member boral mi 286 te sunna hun hman a ni a, YMA Kumpuan hmalakna hnuaiah Fa nei tam, nupa tuak ruk (6) te hnenah chawimawina thuziak leh pawisafai hlanin Luidung leh ramngaw humhalh kawnga hma la tha Branch YMA te hnenah chawimawina an hlan a, Leng Branch YMA chuan lawmman pakhatna dawngin North Vanlaiphai Damdawi Veng Branch in lawmman pahnihna leh Sailulak Branch in lawm-man pathumna an dawng bawk.

Serchhip Sub-Hqrs. YMA-ah hian Group YMA pathum awmin YMA Branch 74 a awm mek a, YMA Member 38,909 an awm a ni.