National Commission for Scheduled Tribes hotu ten Chief Minister leh Governor an kawm

Mizoram-a rawn zin National Commission for Scheduled Tribes (NCST) te chuan nimin khan Chief Minister Lalduhoma an kawm bakah Governor General (Dr) Vijay Kumar Singh chu an kawm bawk,

National Commission for Scheduled Tribes (NCST) leh Chief Minister te hi CM Conference Hall-ah inkawmin Chief Minister Lalduhoma chuan NCST Chairman leh Member ten kokim taka Mizoram an rawn tlawh avangin lawmthu a lo hrilh a. State Review Meeting an buatsaih te, Autonomous District Council an tlawh te chuan Mizoram tan rah tha a chhuah ngei a beisei thu sawiin, “Kan ADCs ten hmasawnna hna tam zawk an thawh theih nan Budget pangngai bakah hian Additional Fund hi central sawrkar hian min siamsak thei se kan duh a. Union Minister of Minority Affairs bulah pawh ka sawi tawh thin a ni,” a ti a. “Tunah hian Working Women Hostel paruk kan sa mek a, Women College hi kan inkawmna behchhan hian Central sawrkarah Project te siam ila a that ka ring. Ruihhlo tawlhrukna hluar chho do turin Coordination Committee chak tak kan din a, kan bei zel dawn a ni. Hindi Education hi kan ngaipawimawh a, zirna-ah Three Language Formula hi kalpui theih tha kan ti,” tiin Comnission ngaihpawimawh thila Mizoram sawrkar hmalakna tlangpui a lo hrilh bawk a ni.

NCST hi an Chairman Antar Singh Arya chuan hovin Commission member Nirupam Chakma, Dr. Asha Lakra leh Jatothu Hussain te pawh an tel bakah Commission Secretary Puneet Kumar Goel leh Official pawimawh te an tel bawk a, Commission member te hian Mizoram sawrkarin a lo dawnsawn danah lawmthu an sawi a. An ngaihpawimawh thil hrang hrang te Chief Minister hnenah hian thlenin, a tulna apiangah Mizoram sawrkar tanpui tura an inpeih thu an hrilh a. Delhi lama a zin leh hunah Commission tlawh ve ngei turin an sawm bawk.

National Commission for Scheduled Tribes (NCST) hotute hian nimin vek khan Mizoram Governor General (Dr) Vijay Kumar Singh chu Raj Bhavan-ah tlawhin an kawm bawk a, he hunah hian Mizoram Larsap, General (Dr) Vijay Kumar Singh (Retd) chuan Scheduled Tribe dinhmun zirchianga Mizoram rawn tlawhtu National Commission for Scheduled Tribes (NCST) te hmalakna lawmawm a tih thu sawiin, Mizoram chu Scheduled Tribe deuh vek chenna State a nih avangin Scheduled Tribe tana hmasawnna leh hamthatna awm theite tha taka kalpui a nih theih nana tanlak a pawimawh thu a sawi a. National Commission for Scheduled Tribes (NCST) hotute chuan Mizoram an cham chhunga an thil hmuh hrang hrangte leh zirchianna bakah Mizoram hmasawn nana tul nia an hriatte Larsap hnenah hian an thlen bawk a ni.

NCST hian Mizoram-a Autonomous District Council te an tlawh kual hnuah niminpiah khan Secretariat Conference Hall-ah State Review Meeting an nei a, Chief Minister in nizan hmasa khan Aijal Club-ah zanriah a buatsaih bawk.