MUHCS kalpui mek Minister hovin thlirhona neih a ni

Mizoram sawrkar in April 1, 2025 atanga a kalpui ‘Mizoram Universal Health Care Scheme’ thlirletna hun chu nimin khan Health Minister Lalrinpuii hovin neih a ni.

Mizoram Health Care Society buatsaiha DHME Conference Hall, Aizawl-a Performance Review Meeting on MUHCS Implementation-ah hian Health Minister Lalrinpuii chuan mipui hmangaih vanga Mipui Health Care hi duan a nih thu a sawi a. “Awlsam zawng ngaih-tuah ni ila reimbursement kan kalpui thei reng a. Mahse, mipui hmakhua kan ngaih avangin Cashless kalpui a ni,” a ti. Health Minister Lalrinpuii chuan, mipui sawrkar, mipui ta, mipui tana ding kan Sawrkar in mipui tana Health Care system hi a duan a nih tlat avangin a hlawhtlin chhoh zel a beisei thu a sawi bawk a ni.

Sawrkar chuan theihtawpin Sawrkar damdawi In-te a thuam that zel thu pawh Health Minister chuan sawiin, “Nurse 300 lak belh an ni a, Multi Task worker 100 lak thar an niin, thawktu hrang hrang X-Ray Technician, Lab. Technician leh Public Relations Officer (PRO) te thlengin lak belh an ni a. Health Worker 100 lakbelh a ni dawn mek bawk a, infrastructure lamah pawh NABARD hnuaiah PHC leh Sub-Centre engemaw zat sak that a ni dawn a, JICA hnuaia Cancer Super-speciality Hospital kan neih tur chu kalpui mek a ni,” a ti a. Heng bakah hian ZMC hnuaia ICU 13 siam belh tur te, Cardio Thorasic leh Neuro Surgery Unit din thar tur te, Aizawl Civil Hospital-a Kidney Transplant lam din tura hmalak mek anih thu te, IVF Centre Level 1 License pek a nih dante a tarlang bawk a, Sawrkarin theihtawp a chhuah avangin PHC/CHC te chu mipui hmangaihna nen tun aia nasa lehzuala tan la turin a fuih bawk a ni.

He hun hi H&FW Department Principal Director Dr Lalthlengliani chuan kaihruaiin Mizoram-a Community Health Centre (CHC) leh Primary Health Centre (PHC) a thawktute an tel a. MUHCS an kalpui dan hrang hrang thlirho a ni.