Motor Vehicle Enforcement Checkgate hawng

Aizawl Phunchawng-a Motor Vehicle Enforcement Checkgate siam thar chu nimin khan Transport Department changtu Secretary Zosangliana chuan a hawng.

Motor Vehicle Enforcement Checkgate hawnna hunah hian Transport Secretary chuan Transport Department in Mizoram chhung hmun hrang hrang- Vairengte, Rengtekawn leh Kanhmun-ah te Motor Vehicle Enforcement Checkgate a neih thu leh tuna hawn tak Phunchawng a mi hi a palina tur a nih thu a sawi a, Checkgate hmasa Rengtekawn a mi chu a thlak dawn thu a sawi bawk. Khawvel changkanna in a kentel lirthei lo pung zel avang te, chumi in a ken tel dan bawhchhiatna pung leh a kaihhnawih chi hrang hrang laka invenna turin Checkgate thar chu Mizoram tan thil chhinchhiah tlak tak a nih dawn thu pawh sawiin, hemi lama tangkai tak tur hian tuna Check Gate hawn turah hian lirthei, a bikin bungraw phur chi ho te'n dan phal chin aia tam (overload) in an phur em tih uluk taka endikna tur Weighbridge pawh dah a nih thu a sawi a, Checkgate-ah hian 24x7 in Transport Department hnuaia Enforcement Staff te an duty dawn a. Anni hian lirthei chi hrang hrang endik hna an thawk dawn tih sawiin. dan phal chin aia rit phur te chu hrem theih an ni dawn tih a sawi bawk.

Checkgate-a Weighbridge hi sawrkar leh M/s Green Hills Infrastructure-te tangdunin  an bun niin anni hian Weighbridge installation bakah a tehna khawl operate lam an buaipui dawn a. Motor Vehicle Act & Rules-ah hian lirthei inkaihhruaina dan chi hrang hrang a awm a. Heng te hi lirthei neitute'n tha taka kan zawm a pawimawh in a bikin bungraw phur chi lirthei te'n an phurh theih zat aia rit an phur a nih chuan hremna a sang em em a. Rs. 20,000 chawi bakah Tonne 1 zelah Rs 2000 chawitir a hrem theih a ni.