MPSC din champhaphak vawi 34-na lawm a ni

Mizoram Public Service Commission (MPSC) in kum 34 a tlin lawmna chu nimin khan Aijal Club-a Mc Cabe Hall-ah neih a ni.

MPSC dinchampha lawmna hun hi MPSC Secretary Dr. H. Lianzela chuan kaihruaiin thawktute intuaitharna leh infuihtharna atan hman niin MPSC Chairman R. Lalramnghaka leh MPSC Member ten fuihna thu an sawi bakah MPSC a din tirh atanga tun thlenga la thawk mekte chawmawina hun hman nghal a ni a, K. Rosiamliana, Joint Secretary in MPSC lo indin chhoh dan sawiin, Controller of Examinations chuan James Lalrinchhana chuan lawmthu sawiin hun a khar a ni.

Mizoram Public Service Commission hi India Danpui Article 315-na tlawhchhanin kum 1991 khan din a ni a. May ni 1, 1991 khan Mizote zinga IAS ni thei hmasa 3-na, SR Vala chuan Sawrkar in a ruat angin MPSC Chairman hmasa ber ni turin a hna a zawm a. Hei hi Vawiin thlengin MPSC din ni atan pawm chhoh a niin, kum 2025 hian kum 34 a lo tling ta a ni. 

Kum 1991 atanga tun thlengin MPSC hian Chairman 12 nei tawhin, Member mi 21 zet an awm tawh bawk a. Anni puibawmtu (Officer & Staff) zinga hotupa ber, Secretary pawh mi hrang hrang 11 lai he hun chhung hian awm tawhin, tun dinhmunah hian MPSC chuan sanctioned post 86 a nei mek a ni.

Group A leh B Direct Recruitment hmanga kum 34 chhunga a lak zawng zawng belh khawm chu mi 3792 an ni tawh a. Sawrkar hnathawk lai mi tam takin kaisanna an hmuh theih nan Departmental Promotion Committee (DPC) Meeting vawi 4578 zet neih a ni tawh a. Departmental Exam, Limited Competitive Exam leh Induction atana Exam engemaw zat a buatsaih tawh a. mi thahnem tak chuan promotion an lo hmu tawh a ni.

MPSC hian a hnathawhna kawngah faina lama lawmman te bakah lawmman dang hlu tak takte lo dawng tawhin RTI Excellence Award for 2024-2025-ah te; Government Online Excellence Award 2021-2022- Official Department Website-ah te; Government Online Excellence Award 2021-2022- Best Online Service Initiatives leh Government Website Award 2022-2023 ah te lawmman pakhatna an dawng tawh a ni.

Hna zawng lai leh thalai te tan a tul anga hman turin Online portal mpsconline.mizoram.gov.in siam niin, hna zawng mekte tan a tangkai hle a. Awlsam taka application submission, payment tih fel leh admit card download theih a ni a. MPSC Website https//: mpc.mizoram.gov.in pawh rintlak tak leh active taka vawn niin mipui ten information an mamawh te chu engtik lai pawhin en theih tura enkawl leh update niin a bik takin thalai hna zawng mek ten an hmang tangkai hle a ni.