GSDP atan inremna ziakfel

Samagra Shiksha Mizoram leh Mizoram State Sports Council (MSSC) chuan Grassroots Sports Development Programme (GSDP) kalpui dan tur inremna, Points of Agreement chu nimin khan an ziak.

Sports & Youth Services Department changtu Minister Lalnghinglova Hmar Pisa-a inremna an ziah ah hian Mizoram State Sports Council aiawhin an Secretary Henry C. Lalrawnkima leh Samagra Shikhsa, Mizoram aiawhin State Project Director C. Lalthanzira ten an hming an ziak a. Grassroots Sports Development Programme (GSDP) in a tum ber chu sawrkar hnuaia School-ah Sports Training mumal taka kalpui a ni a. Infiamna huang hrang hrang thlan bikah kum 6 atanga kum 14 inkarte zirtirna pek a, theihna nei sangte tana kawng inhawn zelna tura kaihhruai a ni. Mizoram sawrkar in ‘Vision 2036 Olympics’ a neih mek hnuaia Empowering Mizoram Sports (EMS) a kalpui mek nena kaldun thei tura duan a ni.

Samagra Shiksha, Mizoram leh Mizoram State Sports Council te hian January ni 13, 2025 khan thawkdun turin thuthlung an lo ziak tawh a, hemi bawhzuina kal zelah Grassroots Sports Development Programme a an thawhdun dan tur chu nimin khan tihfel a ni a. Thawhdun dan tur inremna an ziahah hian Samagra Shiksha, Mizoram in cheng nuai 92 chu Mizoram State Sports Council hnenah a bul tanna kum khat atan an pe anga. Programme Coordinator leh thawktu pakhat dang MSSC hnenah hian an awm bawk ang. Hei bakah hian SSM chuan an bungraw mamawh angte an tum dawn bawk a ni.

Mizoram State Sports Council lamin GSDP kalpui leh enkawl hi an buaipui dawn thung a, hemi tur hian Programme Coordinator leh SSM atanga thawktu dangte pawh an hnenah an awm dawn a. Trainer leh Assistant Trainer lak chungchangah SSM leh MSSC te hian thu an nei kawp ve ve ang.