LADC-ah CEM thar tur ruat a ni leh ta; LSA in eng party mah sawrkar tir rem an ti lo
Mizoram Larsap Gen. (Rtd) Vijay Kumar Singh chuan Lai Autonomous District Council (LADC)-a Chief Executive Member (CEM) atan BJP MDC N. Zangura a ruat a, ni 10 chhungin sawrkar fiahna neih tur niin Lai Students’ Association chuan LADC-ah hian eng Party mah sawrkar tir an rem ti tawh lo tih an sawi thung.
Mizoram Larsap in LADC-a CEM atana N. Zangura a ruatna thuchhuah in tarlan danin M. Kawnpui Bial atanga MDC leh United Democratic Alliance Legislature Party Leader N. Zangura hian CEM atana thawptu a ngah tawk leh tawk loh finfiahna chu Order chhuah atanga ni 10 chhungin neih a ni dawn a, hei hi a paltlang anih chuan tun term chhunga LADC CEM palina tur a ni dawn a ni.
Hetihlai hian Lai Students’ Association (LSA) chuan nimin khan thuchhuah siamin 11th LADC-ah politician ten mipuite ngaihtuahna nei lek lova mahni mimal hamthatna duh luat vangin nasa takin a buai mek nia sawiin, “A ram leh hnam ang pawhin nasa takin kan mualpho mek a ni,” an ti a. Sawrkar mumal a awm theih loh avangin LADC budget chu pass theih ala nih loh thu leh hei vang hian sawrkar hnathawk te pawhin thla hnih hlawh an lak theih tawh loh thu an sawi a. District Council chunga thuneitu ber Governor hnena an duh dan an thlen ah chhanna engmah an la dawn loh avangin an thilphut chu an thlen nawn leh tih an sawi a ni.
Governor hnena an thu thlen ah hian LSA chuan 11th LADC hi vawi nga (5) lai a buaina a ni tawh tih sawiin, sawrkar nghet a awm theih loh avang hian a rang thei ang bera 11th LADC chu thiahna thupek (Suspension Order) chhuah turin Governor hi an ngen a. 11th LADC-ah hian eng Party mah sawrkar tir an rem ti tawh lo tih sawiin, LADC term dinglai thiahna thupek hi ni li (4) ralhmaa chhuah a nih loh chuan Lawngtlai khawchhunga awm Office zawng zawng tiamchin awm lova khar tir an nih tur thu an sawi a. Sawrkar thar tha tak LADC-ah a awm theih nan a rang thei ang bera General Election nei tura hma lak sak turin Governor chu an ngen thu an tarlang bawk.