Rel kawng siam hna zofel tawh tih sawi

Northeast Frontier Railway Chief Public Relation Officer Kishore Sharma chuan Bairabi atanga Sairang thleng Rel kawng siam hna chu zaa za zawhfel a ni tawh tih sawiin, a him dan enfiah mek niin July thla atanga service tura ruahman a ni tih a sawi.

Northeast Frontier Railway Chief Public Relation Officer Kishore Sharma chuan Sairang thleng tura Rel kawng siam mek chu Nilaini khan Rel tlantir chhin a ni tih sawiin, hlawhtling takin a tlan tih a sawi a, Rel chuan kilometre 51 chuang zawhin niminpiah khan khan Rel tlan nawn tir leh anih tih a sawi bawk.

North Eastern Railway General Manager of Construction AK Chaudhary pawhin nimin khan Chief Minister Lalduhoma chu a Pisa-ah kawmin tun tumah hian Rel a rawn ken thu sawiin, “Sairang thlengin ka rawn tlan thleng thei tawh a. Hnathawktuten chhun zan zawmin hna an thawk reng a. Kumin June thla laihawlah Commission of Railway Safety Inspection neih a ni ang. June ni 17 hnu lamah chuan hawn theiha engkim kan inpeih hman kan beisei,” tiin an hnathawh tlangpui a hrilh a. Nikum a Hortoki Station leiminin a tihchhiat pawh chak taka an sak that leh thu a tarlang a, Bairabi Station-a buhfai thlen hunbi te, unloading leh a phur chhuaktu truck lamin harsatna an tawh thin chungchangah pawh sawiin, “Hun reilote ah bungrua te hian Sairang an rawn thleng thei tawh dawn a ni,” a ti bawk.

He hunah hian Chief Minister hian meeting a neihpui hmasaka an lo sawi tawh, Bairabi Rel Station tihchangtlunna hna te, Mualkhang Station approach road chungchang te, Sairang Station hna kal mek te leh an hmalak dang te a sawipui leh a ni.