Insak tanpui dilna lut te Bawrhsap hovin enfiah a ni

Nimin khan Serchhip-ah District Committee for Screening/Selection of Beneficiaries under PMAY (U) 2.0 HFA-BLC chu thukhawmin PMAY(U) 2.0 - Housing for All Mission hnuaia In sak tanpuina dilna lut te an enfiah.
Serchhip DC Meeting Hall-a thutkhawm hi Bawrhsap Paul L. Khuma chuan kaihruaiin Member Secretary leh DUDO Gaston Vanlalhriatpuia chuan PMAY (U) 2.0 - Housing for All Mission for Urban Areas chungchang sawiin, he Scheme atanga In sak tanpuina dil theih a nih thu hriattirna chu tihchhuah a nih tawh thu leh dilna 314 dawn tawh thu a sawi a. UD&PA Department-a thawktu ten a hmuna enfiah vekin heng zinga 130 chu inkaihhruaina in a phut anga pawm tlak a ni tih finfiah a ni, a ti.

He Meeting hian tanpuina diltu zinga tanpuina pek tur mi 83 te thlangchhuak nghalin UD&PA Department-ah report tura pawm a ni a. Thutkhawm kaihruaitu Bawrhsap chuan Departmenta thawktute leh tlawmngai pawl aiawhte chu tha taka dan zawm tur leh mumal zawka Scheme kalpui a nih theih nan thawhhona tha tak nen uluk taka hma la turin a ngen a ni.

PMAY (U) 2.0 ah hian Mizoram pumah beneficiaries 2000 chauh awmin Pilot Project angin Dstrict Headquarters ah kalpui tur a ni a, a hma chuan cheng nuai 1.5 Central Assistance hmuh thin niin tunah erawh cheng nuai 2.5 chu Central atangin leh State sawrkar atangin Rs. 25000 an dawng anga, beneficiaries in Rs. 62,500 a thawh dawn bawk a ni. In sak hun chhung hi thla 18 tur niin, hetah hian LSC/Pass nei sa an ni tur a ni a. Hemi mai bakah hian kum 7 tal an sakna khua turah an cheng tur a ni. An chhungkua annual income chu cheng nuai 3 ai tam lo a ni tur a ni a, Pucca building nei tawh tan dil a rem lo bawk. Pawisa hi installment-a 40:40:20 a pekchhuah tur a ni a, Bank account hi MRB leh SBI-ah chauh an thun ang. Pawisa pekchhuah dan hi PFMS System hmanga pek tur a ni.