Hmarchhak State te tan sum tam tak ruahman tih sawi

Mizoram tlawha lo zin Union Minister of State for Textile & External Affairs, Pabitra Margherita chuan Mizoram tiamin, hmarchhak State te hmasawnna ruhrel din kawnga tih hmasawn nan sum tam tak ruahman a ni tih a sawi.

Nimin-a Hotel Regency-a thuthar thehdarhtute a kawmna ah Union Minister of State chuan hmarchhak State te chu leilunga a hausak bakah kutthemthiam lamah pawh theihna sang tak nei a ni tih sawiin, hemi kawngah hian Ministry of Textile chuan Puantah thin te tihhmasawnna tur hmalakna a duang chho mek tih a sawi a, Mizoram pawh hnam ziarang hausa tak a nih bakah Muga Silk tharchhuak tura theihna nei a ni tih sawiin, Modi-a sawrkar hnuaiah Mizoram tiamin hmarchhak state te chu tihhmasawn zel an ni tih a sawi.

Union Minister chuan Mizoram in kawng tinrengah hmasawn theihna tur a ngah hle tih pawh sawiin, kum 60 liamta chhunga la thleng ngailo Prime Minister Narendra Modi-a kaihhruai hnuaiah hmasawnna tam tak thleng a awm tih a sawi a, hmarchhak bial-ah pawh remna leh muanna a thleng chho mek tih pawh sawiin, DoNER Ministry NEC hnuaiah hmarchhak bial hmasawnna tur tam tak thawh a ni tawh tih a sawi a, chawlhkar hnih (2) dan zelah Union Minister hrang hrang chuan hmasawnna hnathawh mek chu ramchhung hmun hrang hrangah a hmunah ngei tlawhin an enpui thin tih a sawi bawk.

Sawrkar laipuiin inkalpawhna tha a ngai pawimawh tih pawh Union Minister chuan sawiin, a vawi khatna atan Mizoram chu State chhung hmun dangte nen Rel kawng hmanga thlunzawm a ni dawn tih a sawi a, sawrkar hmasa nen khaikhinin tuna sawrkar chuan hmasawnna ruhrel din nan Budget pawh a letin a tihpun thu a sawi a. Hei bakah hian Mizoram khawthlang lama Indo-Bang-ladesh ramri-a Integrated Check Post (ICP) leh Kawrpuichhuah khuaa kawngpui siam chu a rang thei ang bera hman theih a nih tur thu a sawi bawk.