Tlabung leh a chhehvel in Hmunphiah hralh zo

Tlabung leh a chhehvel khaw hrang hranga Hmunphiah chingtute chuan kumin-a an tharchhuah ang ang te chu an hralh zo thawkhat tawh tih an sawi.

Mizoram-a Hmunphiah tharchhuah tamna pawl ni thin Tlabung leh a chhehvela Hmunphiah chingtute sawi danin, kumin hian khaw hrang hranga Hmunphiah chingtute hralh belhkhawm chu a vaiin quintal 5000 bawr vel a tlin rin a ni a, Hmunphiah an hralhna tam ber chu Sawrkar-in a hriatpui Society leh a bika a thawhpuite an nih laiin, mimal anga lei engemaw zat an awm bawk a ni. 

Tlabunga Doordarshan palai zawhna chhangin Tlabung leh a chhehvela Hmunphiah chingtute chuan, kumin hian Hmunphiah hi a ro kg khat Rs. 70 atanga Rs. 100 zelin an hralh tlangpui tih an sawi a, an duhthlanna avanga a hrin laia hralh an awm bawk niin an sawi a, Hmunphiah chingtute thar leisaktu Zodin MPACS hotute chuan, tun dinhmuna an hriat theih chinah khaw hrang hranga Hmunphiah chingtuten an tharchhuah ang ang chu an hralh zawh vek thu leh hralh theih loh vanga tun thlenga la kawl an neih tawh loh thu an sawi bawk a ni.

Hemi hmalam tun thla ni 1 khan Adviser to Chief Minister, Dr. KC. Lalmalsawmzauva chuan sawrkar in a intiam angin Hmunphiah a lei zo vek tawh tih ZPM General Hqrs. Upa Committee hruaitu ten an kawmna ah a lo sawi tawh a, Hmarcha leh Aieng erawh sawrkar inrawlh ngai lovin a chingtu ten an hralh zawh theih thu leh Sawhthing chungchang ah erawh chuan harsatna an tawh thu a sawi a. Chhan hrang hrang avangin sawrkar in an beisei leh duhthusam in a lei chak theih loh thu a sawi bawk a ni.