BJP Mizoram in Waqf (Amendment) Act, 2025 chungchang inhrilhhriatna hun an buatsaih

BJP Mizoram chuan nimin khan Waqf Bill chungchang inhrilhhriatna hun buatsaihin he hun hmanpuitu Union Minister of State, Pabitra Margherita chuan Waqf Amendment Act 2025 chu hun rei tak atanga thil diklo thleng tawhte tih dikna a nih thu leh vantlang mipuite tana hamthatna a thlen theihna tura hmalakna a ni tih a sawi.

Aizawl Hotel Regency-a he hun buatsaih ah hian Union Minister of State for External Affairs Pabitra Margherita chuan Waqf (Amendment) Act, 2025 pass a nih tak avangin inthlak danglamna duhawm tak kan tawng ta tih sawiin “He bill thar hian a bik takin hun rei tak chhung khawtlangah indaidanna zau tak lo awm thin chu a zim theih nan a pui dawn a, mipui aw leh theihna pholan lama indaidanna lo awm thin te pawh a titawp tawh dawn a ni,” a ti. Waqf (Amendment) Act, 2025 hi dan siam that mai ni lovin khawtlang nunphung chawisang tura hmalakna pawimawh tak a nih thu pawh a sawi a. “He dan hi Democracy dan dik tak kalpuia pass a ni a, thla 5 chhung zet member 31 awmna Joint Parliamentary Committee (JPC) Meeting vawi 38 neih a nih hnu, Petition 7,772 thlirletna neih a ni a, palai 284 nena inrawnkhawmna buatsaih a nih hnuah online-a rawtna maktaduai khat vel thlirletna neih niin Parliament-a darkar 25 chuang sawihona neih a nih hnua pass a ni,” a ti bawk.

Union MoS Pabitra chuan he dan siamthat a nih chhan bulpui ber chu, mi zawng zawng huapzoa hmalak tumna vang a ni tih pawh sawiin, “A vawikhatna atan Muslim community chhunga mi hnuaihnung zawk; Bohras, Aghakhanis leh Backward Class Muslim-te chuan State leh UT Waqf Board-ah mandatory representation an nei tawh dawn a ni. Hei bakah hian tunah chuan Waqf Board leh Central Waqf Council tinah Muslim hmeichhe pahnih tal an thawk tawh dawn bawk. Hei hian hun rei tak chu la awm ngailo intluktlanna chu a thlen tawh dawn a ni,” a ti.

Mizoram-a Waqf Sudhar Jan Jagran Abhiyan Convener Lalrinliana Sailo chuan Waqf Act-in a tum ber chu India-a mihring awm zawng zawngte chu eng sakhaw mi pawh ni se angkhat veka dan hnuaia awm tir a ni tih sawiin, India ram pumah Muslim ten an hman Waqf kaihhnawihah rambuai leh bungraw chungchang tiamin case sing li dawn a awm mek a ti a, he danah hian sawrkar a inrawlh theih loh avangin sawrkar chuan India-a mihring awm zawng zawngte chu eng sakhaw mi pawh ni se ang khat veka dan hnuaia an awm theih nan Waqf (Amendment) Bill chu a pass a ni, a ti bawk. WAQF hi Islamic Law hnuaia thuamthil a thlawna inpek dan phung a ni a, India-ah chuan WAQF Act, 1995 hnuaiah hriatpui leh chuktuahrem a ni a, Islamic Law hnuaia thilthlawnpek te a huam vek a, kumin April ni 4 khan Waqf siamthat rawtna, Waqf (Amendment) Bill, 2024 chu Parliament chuan a pass a, Waqf (Amendment) Act, 2025 tih a lo ni ta a ni.