National Ayush Mission Conclave-ah mamawh thlen

National Ayush Mission Conclave chu nimin khan Lonavala, Pune, Maharashtra-ah neih niin he hunah hian Mizoram atangin Health Minister Lalrinpuii pawh a tel a ni.

Ni 3 chhung awh tur National Ayush Mission Conclave hi Union Minister of State Prataprao Jadhav hova neih niin India ram chhunga ‘Best performing State’ thlanchhuah zing ami kan nih angin Health Minister Lalrinpuii chuan thu a sawi a, Mizoram chu Ayush Health Programme nasa taka kalpuitu anih thu te, India ram State zinga Best Performing State anni chu lawmawm a tih thu te, Mizoram-ah Ayush Dispensaries din a pawimawh thu te sawiin, hemi atana pawimawh Man power pe turin Central Sawrkar a ngen nghal bawk. 

Hei bakah hian AYUSH Department hnuaia hmachhawp hrang hrang te sawiin Health Minister chuan, nitin Ayush OPD bakah Peripherral OPD an kalpui chu mipui ten an hlut zia leh chhunzawm zel an tum thu te, mipui ten Ayush damdawi in an pan nasat tawh zia leh OPD/IPD patient an pun zel thu te sawiin, khum 10 awmna Ayush Hospital hmun thuma sakna tur DPR cheng vbc. 22.50 senna tur a thehlut nghal bawk a. He Conclave buatsaih a ni hi Minister chuan lawmawm a tih thu leh he Conclave hian rah tha chhuah ngei se a duh thu a sawi bawk.

He Conclave-ah hian Ayush hmachhawp hrang hrang leh Health Programme hrang hrang kalpui dan turte bakah lian zawka State hrang hranga Ayush kalpui dan turte zirho a ni a, Round Table Discussion hlawk thlak tak neih a ni bawk a ni. Mizoram atangin Health Minister hi Dr. S. Mara Thansiami, Deputy Director, Ayush leh Lalduhawma Chhangte State Programme Manager, Ayush ten an tawiawm a ni.