Bangladesh ramri lamah venhimna uluk lehzual a ni

India leh Pakistan inkar boruak a chhiat avang leh boruak inlumlet zelah Bangladesh ramri lamah venhimna khauh zawka kalpui a ni.

Police hotute sawi danin tunhnai khan Mizoram Police hotute leh Paramilitary Force, Central Armed Police Force (CAPF) leh Intelligence pawl aiawhte chu Aizawl-ah an inhmukhawm a. Kilometre 318 a thui Mizoram leh Bangladesh ram inrina vengtu Border Security Force (BSF)-te chu ramri ven kawngah uluk leh khauh lehzuala thawk tura hriattir an ni. Pakistan hian Bangladesh a firfiak pawlte hmang tangkaiin India ram tihbuai a tum ni a thudawn a nih avangin Bangladesh ramri-ah hian venhimna khauh zawka kalpui nise tih a ni a, chutiang a hmala tur chuan BSF te hrilh an ni.

Hemi hma hian Intelligence pawlte leh veng-himtu sipaite chu Bangladesh nena ramri-a venhimna ngawrh zawka kalpui tura hriattir an lo ni tawh a. Meghalaya sawrkar phei chuan ramri hrulah hian zan curfew a puang mek a. Pakistan enthlatu pawl ISI mite leh Pakistan sipai Officer engemawzat Bangladesh a tirhluh an nih avang leh Bangladesh sawrkar hawiher enin venhimna hi khauh zawka kalpui a ni.

Bangladesh sawrkar-a dinhmun pawi-mawh tak chelhtu pakhat Maj. Gen. ALM Fazlur Rahman chuan India in Pakistan a beih chuan China nen tangrualin India hmarchhak chu awp tura beih a nih tur thu a lo sawi tawh bawk a ni.