Damlo enkawlna cheng vbc. 2.59 pechhuak tawh

April ni 1 atanga hman Mizoram Universal Health Care Scheme (MUHCS) hnuaiah damlote a thlawna an inenkawlna atan cheng vbc. 2.59 chuang sawrkarin a pechhuak tawh.

MUHCS hnuaiah hian April thla bakah May ni 5 khan sawrkarin Rs. 1,49,98,238 a pechhuak leh a. Cashless hmanga MUHCS kalpui mekah hian damlo 2,943 hnenah an inenkawlna senso hi damdawi In 48 hnenah pekchhuah a ni tawh a. Damdawi In 48 zinga 2 tih loh chu sawrkar damdawi In vek a ni. Zoram Medical College & Hospital hnenah damlo enkawlna senso pek chhuah tam ber a ni a, Zemabawk-a Mizoram State Cancer Institute-in dawtin pathumna chu Aizawl Civil Hospital a ni a. Khaw hrang hranga sawrkar enkawl District Hospital bakah Community Health Centre leh Primary Health Centre atang pawhin mi thahnem tak hnenah pekchhuah tawh a ni a.

Damlo enkawlna senso bill endik tawh la pekchhuah loh chu cheng vbc. 4.11 a la awm mek a, la endik mek dilna lut bill la chinfel loh 490 a awm bawk a ni.