Scholarship atan SMS-ah buaina awm lo niin sawi

ZPM Thalaite chuan ZPM sawrkar hnuah Post Matric Scholarship atan budget-ah State Maching Share an dah avangin tun sawrkarah State Maching Share-ah buaina a awm ve tawh ngai lo niin an sawi.

Hemi chunghanga thuchhuah an siamah ZPM Thalaite chuan Scheduled Tribes Student-te tana Post Matric Scholarship chu central sawrkarin 90% a tum thu leh State sawrkarin 10% (State Matching Share) a tum thin thu sawiin, Mizoram Scholarship Board enkawlna hi State Assembly Budget-a Demand No-21 niin Sawrkar hmasa hunlaia Budget siam dan enlêt chuan, Post-Matric a State Matching Share hi Budget-ah dah a ni ngai lo niin an sawi a. ZPM te Opposition Party an nih lai khan Assembly Session-ah ngei tuna Chief Minister Lalduhoma pawhin sawichhuakin, “Scholarship chungchanga Scholarship Board leh Zirlai te'n, buaina an tawh tam tak hi State Budget-ah DAH a nih thin loh vang a ni,” tiin a lo âuchhuak thin niin an sawi.

ZPM Party-in Sawrkarna a chan hnuah, mahnia budget an pharh hnû chuan Demand No. 21-ah Post Matric Scholarship for ST students te tan hian State Matching Share atan budget ah dah a nih thu sawiin, kum 2024-2025 Budget-ah Post Matric Scholarship atan cheng nuai 622.28 dahin, kum 2025-2026 Budget-ah cheng nuai 492.82 dah a ni tih an sawi a, Sawrkar hmasa hunlai anga Central Sanctioned Order hmuh tawh hnua State Matching Share tur dap chawp ngai lovin, ZPM mipui sawrkara Finance Minister leh Chief Minister ni bawk Lalduhoma leh Education Minister Dr.Vanlalthlana te'n hma an lakna zarah, Sawrkar Budget-ah chuan SMS-ah buaina a awm ngai tawh lo niin an sawi a ni.

ZPM Thalaite chuan Accademic Year 2023-2024 atana Post Matric Scholarship for ST pêkchhuah tur PFMS Approved chu zirlai 31,652 an nih thu leh 26,909 pêkchhuah tawh niin 4,743 pék loh a la ni tih pawh an sawi a, heng zirlai 4743 zingah hian 719 in Aadhaar Seeding la tifel lovin 43 chu repush ngai an la awm thu an sawi a, tun dinhmunah Central Sawrkarin sum min pêk veleh zirlai 3981 te hnenah Scholarship hi pêkchhuah theih a ni dawn tih an sawi a ni.

Scholarship dil tlânglawn ber, Tribal Scholarship chungchangah National Portal hman a nih tawh avangin School tinin an profile leh diltu aplication verification-te a rang lama buaipui thin turin an chah a, zirlai te'n Aplication chhan thiam tawk loh an lo thehlut a nih pawha siamthat lehna hun a awm theih nan Mizoram Sawrkar hnuaia School nei zawng zawngte hi lo inpuahchah hma thin se an duh thu an sawi a. Scholarship diltute zingah Eligibility Criteria-in a phût anga documents, Bank Account leh Aadhar seeding te mumal taka buaipui turin an chah bawk a ni.