Aizawl leh a chhehvel-a lei tla avanga vanduaina thlen thinna hmun te enfiah a ni

Council of Scientific & Industrial Research - Central Institute of Mining & Fuel Research (CSIR-CIMR) leh MACCAFERRI Environmental Solution Pvt. Ltd. atanga lokal mithiamte chuan tunhnaia lung tla avanga thihna thlenna hmun te an tlawh hnuah nimin khan DM&R Minister Prof. Lalnilawma hovin inkawmna an nei.

CSIR-CIMR leh MACCAFERRI Environmental Solution Pvt. Ltd. atanga mithiam lo kal te hian niminpiah khan Pukpui, Lengpui kawng an endik hnua nimin khan Ngaizel leh Hlimena lung tlak thinna leh lung tlak mai hlauhthawnawmna hmun te chu an endik leh a, Mihring leh lirthei veivakte tana him lo hmunte an endik zawh hnu hian Chief Minister's Conference Hall-ah Prof. Lalnilawma, Minister, Disaster Management and Rehabilitation Department hovin hmalak dan tur ruahmanna sawi hona hun an hmang zui a ni.

He inkawmna ah hian DM&R Minister Prof. Lalnilawma chuan Mizoram leilung pian hmang leh ruahtui tam vanga khuarel chhiatna thleng thinte chu hriat lawk theih loh ni mah se, harsatna lian zawk thleng lova pumpelh turin tunlai thiamna thar leh tha zawkte hmanga heng chhiatna tiziaawm tur leh titlem thei tura inpuahchah thiam a tul thu a sawi a. Rampawn atanga mithiamte nen Aizawl hmun hrang hranga chhiatna thlen thinna hmun zirchianna leh ruahmanna siam ho thei tura thutkhawmna hun tha buatsaih a ni chu lawmawm a tih thu sawiin, mithiamte nena endikna leh inrawnkhawmna neih chuan nakin zela chhiatna thleng tur ven leh ruahmanna siam kawngah rah tha a chhuah ngei a beisei thu a sawi a ni.

Pukpui, Lengpui, Ngaizel leh Hlimena lung tlakna leh leiminna hmun zirchianna chu Dr. Laldinpuia, Associate Professor, Mizoram University chuan PowerPoint Presentation hmangin a sawifiah a. He thutkhawma tarlan a nih danin Ngaizel kham phei km 1.7 a thui chu lung tlak hlauhawmna a nih thu leh chung zingah meter 405 chu 'Very High Hazard' a nih bakah meter 740 dang pawh 'Vulnerable' anga ngaih theih a ni a. Chhinchhiah danin September ni 24, 2015 leh May ni 1, 2025 inkar khan lung tla avangin lirthei chhia 26, mihring inhliam 9 leh thihna tum 3 a thleng tawh a ni. Thutkhawmnaah hian mithiamte chuan Ngaizel lung tlak thinna hmuna kham te chu rawt zawl deuh (Re-slopping) te, tui put awm nasa vente, thirlen rintlak tak hmanga tuam a concrete a phuh (Gunite) theih dante an sawi bawk a ni.