PAHOSS-ah cheng nuai 1,136 sen hman a ni

Sawrkar hmasa, MNF Ministry hnuaia Traffic jam sutkianna tura siam, Parking House Support Scheme (PAHOSS) chu sawrkar tharah chhunzawm a ni tawh dawn lova. He Scheme atana sum sen ral zat chu cheng nuai 1,136.4 a tling.

PAHOSS hi kum 2019-a bul tan niin ruahman danah chuan Aizawl khawpui, AMC area chhunga Traffic jam tiziaawm tura hmalakna a ni a. A dawngtute chuan an In sak sa emaw, sak lai mek leh la sak turte emaw chu man chawia vantlang motor park-na atan an buatsaih tur a ni. PAHOSS hnuaiah mimal emaw, pawl angin emaw, motor park theihna hmun siam thei hnenah sawrkarin tanpuina, motor pakhat zel park-na hmun ruahman turin Rs 1,00,000 a pe thei a. A tlem berah LMV panga tal park theih tur niin tanpuina dawngtute hian a tlem berah kum 10 chhung tal Public Parking atan an hmang ngei tur a ni.

PAHOSS atan hian Mizoram sawrkarin kum 2018-19 budget-ah cheng nuai 1,000 a dah a, kum 2019-2020 budget-ah cheng nuai 6,000 a dah leh bawk a. Hetihlai hian Covid leng vanga sum harsatna vangin hmalakna erawh a chak thei ta lo nia thudawn a ni.

Thudawn danin February 6, 2019-a khatih laia ChMef minister, Zoramthanga’n a hawn, PAHOSS hi sawrkar thar, ZPM sawrkar hnuaiah chhunzawm a ni tawh dawn lova. A bul tan a nih atanga sum senral zawng zawng chu cheng nuai 1,136.4 a tling a. PAHOSS hnuaiah hian tha taka hma la an awm laiin hma la tha tawk lo pawh an awm nia thudawn a ni bawk.