NGHAM ten MUHCS zawm tumna an la nei lo

Non-Government Hospital Association of Mizoram (NGHAM) chuan tun dinhmunah Mizoram Universal Health Care Scheme (MUHCS) chu zawm tumna an la nei lo tih an sawi.

Mizoram-a mimal leh Kohhran enkawl damdawi In inzawmkhawm pawl, Non-Government Hospital Association of Mizoram (NGHAM) hruaitute chuan tunhnaiah MUHCS zawm tur leh zawm loh tur chungchang ah ngaihtuahna thar an neih loh thu an sawi a, damlo te sum sen ngai lova enkawl (Cashless) System chu an tan risk a sang tih sawiin, nitin sum lut a awm loh chuan Private Hospital tan kal ngaihna a awm dawn lo niin an sawi a, chu chu tun dinhmunah MUHCS an zawm theih loh chhan ber a nih thu an sawi bawk a. He an harsatna hi sawrkar in mumal deuh zawka a ngaihtuah tha a nih loh chuan tun dinhmunah Universal Health Care Scheme chu an zawm theih rih loh thu an sawi a ni.

Non-Government Hospital Association of Mizoram (NGHAM) hruaitute chuan a lan danah MUHCS hi Mizoram mipui zawng zawng huam tur a ni a, chutiang a nih chuan damlo an enkawl zinga zaa 96 chu cashless-a kalpui a ni dawn tihna a ni tih an sawi a, nitin sum lut an neih loh chuan thawktu hlawh te, Damdawi lakna tur te, khawl siamna leh Bill hrang hrang pek tur an nei dawn lo a, hei hi an ngaihtuah a ngaih ve tho avangin Cashless System-a kal tur chuan an tan tih ngaihna a awm rih lo nia an ngaih thu an sawi a ni.

Zawhna chhangin Private Damdawi In enkawltute chuan thla khat chuang MUHCS kalpui a nih hnuah Private damdawi In pantu damlo chu tlem in an tlahniam ve deuh nia an hriat thu an sawi a, Health Care Scheme chungchang ah sawrkar nan an inrem theih loh avanga damlo harsatna tawk an awm chu pawi an tih thu sawiin, mipuite chu sawrkar nen insiamremna leh thu mumal an neih hma chu lo hrethiam tura an duh thu an sawi a ni.