Adviser to Chief Minister (Finance) hovin Aizawl-ah World AIDS Orphans Day hman a ni

HIV/AIDS avanga naupang chanhaite enkawlna Gan Sabra chuan nimin khan Aizawl-a khan I&PR Auditorium-ah ‘World AIDS Orphans Day’ an hmang a, he hun hi Adviser to Chief Minister (Finance) TBC. Lalvenchhunga chuan a hmanpui a ni.

HIV/AIDS avanga naupang chanhaite ni pual-a hun hman ah hian Mizoram State Child Protection hotute, HIV/AIDS vei te enkawlna lama hmalatu tlawmngai pawl hrang hrang aiawhte, Home hrang hranga thawktute leh HIV/AIDS avanga harsatna tawk mi engemawzat an tel a, he hunah hian Adviser to Chief Minister TBC. Lalvenchhunga chuan thil tha ti turin sawrkar fawng chelhtu emaw, thuneihna sang tak neih kher a ngai lo tih sawiin, “Inpekna thuk tak nena hnathawh hian awmzia a neiin, chu chu midang tan malsawmna a ni thin,” a ti a. Thil tha tih kawnga tan la zel turin kalkhawmte a chah bawk a ni.

World AIDS Orphans Day puala hun buatsaihtu Gan Sabra hi kum 2006-a din niin, HIV/AIDS avanga naupang chanhai leh harsatna tawk te enkawlna hmun a ni a. Tunah hian HIV/AIDS avanga harsatna tawk naupang 40 an enkawl mek a, naupang an enkawl tawh zingah hnathawka mahni intodelh, Nursing zir mek leh zirchhuak tawh te pawh an awm a ni.

Gan Sabra hian Community Support and Sponsorship Programme (CSSP) an kalpui bawk a. Sponsorship kaltlang hian Aizawl, Lunglei, Champhai, Mamit, Kolasib, Serchhip leh Saitual District-ah HIV/AIDS avanga harsatna tawk naupang 264 leh chhungkua 118 tan tanpuina pein, an tlawhkual thin a. Thla tin an zirna senso, ei leh in bakah damdawi-a inenkawlna an tumsak thin bawk. Heng tanpuina bakah hian Anti-Retroviral Therapy (ART) damdawi pawh an semchhuak thin a, HIV/AIDS avanga nausen harsatna tawkte tan hnute tui (Formula Milk) te an pe thin bawk a ni.

Nimin-a hun hman ah hian Gan Sabra Chief Functionary Lucy Remruati Chhangte chuan, “Tanpuina hi Central atangin kan dawng a, a tam lova, tun ang dinhmun kan thlen theih chhan chu Mizoram-a Kohhran, khawtlang, NGO leh mimal thahnemngai tanpuina min petute vang a ni,” tiin, tanpuina an dawn thinah lawmthu a sawi bawk.