Zirtirtu inzawmkhawm ten Badge dum bel an tum

Mizoram sawrkar School Zirtirtu inzawm-khawm chuan sawrkar laka an lungawilohna lantir nan tun thla, April ni 21 atanga ni 25 inkarah an hnathawhna hmunah ‘Badge dum’ an bel dawn.

Mizoram sawrkar School zirtirtu inzawmkhawm chuan sawrkar hmasa in zirna hrang hrang dinhmun sang zawka a hlankai te tuna sawrkarin dan siamthat ngai leh fello chhuanlama a paih chu Provincialised status-ah dah let an phut tih an sawi a ni. Mizoram Govt. School Teachers Union (MIGOSTU) chuan sawrkar hmasa in dinhmun sang zawka zirna In a hlankaina Provincialised Status chu tun sawrkar Cabinet thukhawmin a hnawl bakah High School leh Middle School Headmaster kum tam tak lo thawk te zirtirtu pang-ngaia an tlak theihna tur an rawn telh thar an ti a, heng Cabinet meeting in a rel te chu a rang thei ang bera ngaihtuah that leh ni se an duh tih sawiin, Provincialised status ah dah let an duh tih an sawi.

MIGOSTU chuan a tehfung an hmanna ah thingtlang leh khawpui inang renga an siam chu diklo an tih thu pawh sawiin, thingtlanga School te tan kaisan ve theihna a awm tawh dawn lo nia an hriat avangin dan thar an siam chu sut leh vat turin an phut tih an sawi bawk.