Serchhip DC-in Press Accreditation Card sem

Serchhip District atanga Mizoram Sawrkar in Press Accreditation a pek te hnenah nimin khan Serchhip Bawrhsap Paul L. Khuma chuan Press Accreditation Card a sem.

Serchhip DC Meeting Hall-a Press Accreditation Card semna puala hun hman hi Serchhip DIPRO leh I&PR Department-a Deputy Director Lalnunmawii chuan kaihruaiin Press Accreditation chu I&PR Department in an ngaih pawimawh thu leh Aizawl-ah chuan I&PR Department changtu Minister hova sem niin Serchhip-ah paw Bawrhsap hova he hun hi hman a nih thu a sawi a. Hemi hnu hian Bawrhsap hian Serchhip District atanga Accredited Journalist te hnenah hian Press Accreditation Card hi a sem zui a ni.

Press Accreditation Card hi kum hnih (2) chhung zel damin Accredited Journalist ni lai te leh ni thar duh ten I&PR Department-in hun a hawn chhungin dilna hi an thehlut thin a. State Press Accreditation Committee chuan uluk taka a ngaihtuah hnuah Accredited Journalist ni thei te a thlangchhuak thin a ni. Tun tumah hian Serchhip District-ah Accredited Journalist mi 11 te hnenah Accreditation Card hi semchhuah a ni a, Serchhip khawpuiah Accredited Journalist 9 awmin Thenzawl-ah 2 an awm bawk a ni.