Skill Development-a Training-na hmun sak inhuam

Pharmacy Council of India-a President, Dr. Montu Kumar M. Patel chuan Mizoram sawrkar in hmunhma a ruahman sak theih chuan Central lam atanga Skill Development a training-na hmun sakna tur tum an huam tih a sawi.

Ningani-a Aizawl Press Club-a thuthar thehdarhtute a kawmna ah Dr Monty Kumar Patel chuan Pharmacy Council in thuneihna sang tak a nei tih sawiin, State Council pawh in Pharmacist te Training leh Skill Development neih pui reng a tum tih a sawi a, Skill Development a awm theihna turin Mizoram Health Minister a sawipui bakah Mizoram sawrkar in hmunhma a ruahman sak theih chuan Central lam atanga training-na hmun sakna tur tum an huam thu a sawi a ni.

Dr Monty Kumar Patel chuan Mizoram chhunga Pharmacist post sanction 122 awm chungin Pharmacist post ngheta awm mi 25 chiah lak an ni chu pawi a tih thu sawiin, Sawrkar Hospital hrang hrangah Pharmacist thawktu an in daihlo hle tih a sawi a, Mizoram sawrkar chuan post ruak 97 te chu hnawhkhat thuai se a tih thu a sawi bawk. Hei bakah hian Mizoram chhunga Drugs hmansual leh damdawi thalo a tam lutuk te chu veiawm a tih thu sawiin, Drugs khuahkhirhna a that lehzual theih nan Food and Drug Administration hnuaia Drug Control Officer sanctioned post 12 a awm laia post nga chiah lak a nih chu pawi a tih thu a sawi a, post ruak te hi hnawh khah vat theih nise a duh thu a sawi bawk. 

He hunah hian RIPANS Department of Pharmacy Head, Dr. H. Lalhlenmawia chuan dan hnuaiah Pharmacist te kut ngei atang chauha damdawi dawn theih a nih bakah pharmacist te chuan damdawi an pek rualin damdawi ei dan tur leh side effect awm thei thlengin dawmdawi leitute chu an hrilh thin tur a ni tih a sawi a. He dan kengkawh tur hian Mizoram State Pharmacy chuan hma a lak mek thu leh Pharmacist zawng zawng te chu damdawi dawra thu vek tura hma an lak thu a sawi a. Pharmacist te damdawi dawra an thut thlap chuan Doctor chawh chin chiah damdawi an pek thin dawn avangin drugs ngawlveina intanna pawh a kiam vek a rin thu a sawi bawk.