LADC-ah Budget Session nei

Lai Autonomous District Council (LADC) thutkhawm ni thum awh tur chu Ningani khan LADC Chairman T. Zakunga kaihhruaina hnuaiah neih tan a ni. LADC Session Hall, Lawngtlai-a thutkhawm neih tan ni hian Chief Executive Member (CEM) V.Zirsanga chuan kum 2025-2026 LADC Budget chu House-ah a pharh a, CEM chuan kum kalta 2024-2025 ah Budget pangngai piahlam ah LADC in pawisa a hmuh belh loh thu a sawi a, Budget thar chu Budget hmasa aiin Rs. 1392,36,000-a a tam thu sawiin, State Sarkar leh Mizoram Finance Commission chungah lawmthu a sawi a ni. CEM V. Zirsanga chuan Grant-In-Aid ah Rs. 25,75,157 dah a ni tih sawiin, Village Council Remuneration-ah Rs. 182,50,000 dah a ni tih a sawi a, Chhiah tlingkhawm atanga hmuh tur cheng nuai 400 a awm tih a sawi bawk. LADC Session-ah hian Thawhlehni khan Dy. CEM thlanna neih tur a ni ang.