Auditorium sakna tur hmun ngaihtuah a ni

Serchhip Auditorium chu mipuite tana a him lo zel thei nia hriat a nih avanga thian tura hmalak a nih avangin Serchhip Auditorium sakna tura hmalak dan tur chu nimin khan Serchhip Bawrhsap Paul L. Khuma hovin sawiho a ni.

 Kumin April ni 7-a khawtlang hruaitute leh sawrkar hotute thukhawm chuan Serchhip Auditorium hi mipuite tan a him lo ni a hriain chhiatna rapthlak a thlen hmain thiah nise tiin thu an lo dah tawh a. He an thu rel bawhzui hian he thutkhawm hi neiin Auditorium hi thiah a nih dawn avangin Auditorium sakna tur hmun chu khawtlang hruaitute leh tlawmngai pawl ten lungrual taka ngaihtuahin a tul anga proposal siam nise an ti a. Auditorium thar sakna tur hmunhma atan rawtna hrang hrang he hunah hian tarlan niin a hmunhma te zirchiang tur leh zawng turin Site Selection Committee chu an din nghal a ni.

Site Selection Committee-ah hian Chairman atan Addl. DC Lalrinzuala chu ruat niin Member atan Revenue Department, UD&PA, P&E, PWD, Sub-Headquarters YMA, Joint VC, Town Planning leh MJA aiawh te ruat an ni a. He Committee hian nimin-a rawtna lut hrang hrang bakah hmundang te zirchiangin an endik anga, a rang thei ang berin hmunhma hi zawngin an report te chu April ni 30-ah Serchhip DC hnenah an thehlut anga, Committee lian zawkin an rawtna te hi a thlir ho leh dawn a ni.