Serchhip Damdawi In sak mek dinhmun sawiho a ni

Serchhip District Hospital sak kal mek dinhmun chu nimin khan Bawrhsap hova sawiho niin Hospital sak mek hi a hmunah thlir a ni bawk.

Serchhip CMO Conference Room-a sawihona hun ah hian Bawrhsap leh District Monitoring Committee Chairman Paul L. Khuma chuan Hospital mamawhna a san em avangin mi thahnemngaite rawtna angin thutkhawm koh a ni tih sawiin, Health hmunhma te a that loh chuan hmasawnna kawng dang zawng pawh a nghawng a, a kangkai vak thin tih sawiin, khawtlang mipuite leh District tan a ni tih thinlung pu theuh turin kalkhawm te a chah a ni.

Serchhip District Hospital building hlui thiatin tunah hian a thar tur sak hna thawh mek a ni a. Hetih hun chhung hian Serchhip District Hospital-ah hian nasa taka an inbeng hnuah khum 32 chauh a leng thei a. Aizawl lama damlo refer an pun phah nasa hle tih Hospital hotute lam atangin ngaihthlak a ni a. Hospital thar sak mek hi Block thum-ah thenin Block pahnih hi Ministry of DoNER hnuaia North East Special Infrastructure Development Scheme - Other Than Road Infrastructure (NESIDS OTRI) atanga sak tura ruahman a ni a. Block pakhat erawh Power Grid Corporation of India sum hmanga sak tura ruahmanna hi siam a ni thung. Hospital hlui thiah hna thawh zawh vek a nih hnuah chhan hrang hrang avangin Hospital thar sak hna hi mipuite beisei anga chaka a kal duak theih tak loh avangin hmalak zel dan tur chu he hunah hian sawiho a ni bawk.

He hunah hian PWD Sr. EE Project Division-III Lalremruata chuan PWD atanga hma an lak dan te leh an kuta a luh dan kimchang taka ngaihthlak a ni a. A sum ngaihtuahtu Health Department Joint Director Dr. Ruth Lalmuanpuii chuan PGCIL leh NESIDS an dawr dan te leh, harsatna an tawh dan te a sawi a. A sak hna thawktu Zamzo Construction lam aiawh pawhin thu an sawi bawk a. Chak zawk leh tha zawka hna thawh a nih theih dan turte an sawiho a ni.