Kawng dangtu Serchhip College zirlaite an phut ang Zirtirtu pek tum an ni

Govt. Serchhip College zirlaiten sawrkar laka an thilphut tihhlawhtlin ngiata nimin zing dar 8:30 atanga an Campus chhunga vantlang kawng kaltlang an dan chu College SU hruaitute leh Serchhip District Bawrhsap Paul L.Khuma-te nen inbiakna an neih hnuah zing dar 9:30 vel khan lungawi lohna lantir hi tihtawp a ni.

Govt. Serchhip College SU hian Zirtirtu an mamawhna hi nikum lam atangin Chief Minister, Education Minister leh Directorate-ah te pawh an thlen tawh thute sawiin, February 17, 2025-a Chief Minister-in Serchhip District Hospital-a Ultrasound thar a hawnna ah Serchhip College-ah hian zirtirtu Geography Department-ah a nghet pahnih, Zoology Department-ah a nghet pakhat leh nghet lo pakhat, leh BCA Department-ah a nghet lo pakhat dah pêk belh a tiam thu a sawi chu tun thlenga tihhlawhtlin a la ni lo tih an sawi a, hei bakah hian kum 6 chhungin Zirtirtu nghet 13 zet sawnin, an aiah nghet lo dah thin an ni a, an dinhmun ngaihtuahin leh NAAC assesment an hmachhawn turah an College tan a pawi theih thute a sawi a ni.

Heng an thil phutte tihhlawhtlin a nih theih nana sawrkar kar nan hian an Campus chhunga vantlang kawng kaltlang, Serchhip DC Residential Complex, SP leh CJM bakah mimal engemawzat chenna hmun, Khawtetlang panna kawngpui ber chu nimin dar 8:30 atang khan College Gate bulah dang chatin College zirlai engemawzat an pungkhawm a, buaina chhuak thei vêng turin Police pawh engemawzat dah an ni a, College SU hruaitute chuan lungawi lohna an lantir chu boruak muanawm tak hnuaia lantir an tum tih an sawi angin buaina leh innawr buaina a thleng lo a ni.

Zirlaite hian “Zirtirtu nghet sawrkarin min sawn chhuahsak reng hi kan duh lo” tih te, Aizawl pawna College zawng zawngah kan mamawh khawp zirtirtu min dahsak vek rawh se” tih te, “Serchhip Zirlaite hian kan mamawh khawp zirtirtu neih hi kan right a ni” tih te leh Zoology, Geography leh BCA zirtirtu dah belh an phut thute an au chhuahpui bakah thuziak hrang hrang an keng bawk a ni.

Zirlai ten kawng an danna hmun hi District Bawrhsap Paul L. Khuma chuan tlawhin SU hruaitute nen inbiakna an nei a, Bawrhsap chuan helai hmun a thlen hma hian Higher & Technical Education Minister nen an inbiak thu leh, tun Academic Session kal mekah chuan zirtirtu sawn an nih tawh dawn loh thu leh, Transfer & Posting tih leh hmasak ber tur, May thlaah an zirtirtu phût angte pek a tiam tih a sawi a, SU hruaitute chuan hei hi tawngka mai ni lo, ziaka dah ngei an phut ve thung a. District Bawrhsap chuan programme hrang hrang duanlawk an neih avangin tlai lamah ziaka dahfel tura SU hruaitute chu a Pisa-a kal tura a hrilh hnuah SU lam chuan an lungawi lohna lantir hi an titawp ta a ni.