Serchhip-ah Furpui lo thleng tura khuarel chhiatna a thlen thulha inbuatsaih dan tur thlirlawk a ni
He thutkhawm Serchhip DC Meeting Hall-a neih hi DDMA Chairman leh Bawrhsap Paul L. Khuma chuan kaihruaiin Sawrkar Department hrang hrang te, Village Council te, tlawmngai pawl te, Assam Rifles leh BSF te an tel a. Department leh pawl hrang hrang aiawh te hian chhiatna lo thlena hmachhawn dan tura theihtawp chhuah an inhuam thu an sawi a. Thutkhawm kaihruaitu Bawrhsap chuan kan hma lawkah Furpui a lo thlen dawn avangin inbuatsaihna tha taka kalpui a, khuarel chhiatna a lo thlena hmachhawn dan tur ruahmanna kimchang tak siam a tul thu a sawi a, chumi atan chuan he huna DDMA-a Member tel zawng zawng ten an rilru leh ngaihtuahna seng a, rawtna felfai tak nei theuh turin a sawm bawk a ni.
He thutkhawm ah hian chhiatna a thlenin Department tin te, khawtlang hruaitu VC te leh tlawmngai pawl te thawhhona tha a pawimawh thu tarlan niin, khawi hmunah pawh chhiatna thleng se mahni mawhphurhna leh tih tur tlanchhiatsan loa theihtawp chhuah theuh a tul thu sawilan a ni a. Chhiatna thlen tamna hmun, Disaster Prone Area-ah te tang tlang a, a tul chuan hnatlang anga thawhchhuah a, Department te pawh bang bik lova tlawmngai pawl te nen thawkho in rang taka bawhzui zel nise an ti a. A bik takin tui luankawr leiin a hnawhpin avanga chhiatna thleng a tam thin avangin rang taka then nghal thin nise tiin an rel a ni.
Hei bakah hian tunlai thiamna hmang tangkaiin Incident Response System (IRS) Group chu Whatsapp kaltlanga siam a nih thu leh Serchhip District khawi hmunah pawh chhiatna thleng se thuneituten rang taka an hriat theihnan hriattirna post nghal zel nise an ti a. Loneitute thlai tihchhiat (Crop damage) chungchangah zangnadawmna chu DC Office-ah leh Deparment ah a kawpa dilna a luh thin avangin DC Office-a dilna lut reng reng Department-ah hlan chhawngin a dik ngei em tih finfiah nise an ti bawk a. Chhiatna a thlena tih leh tih loh tur (Do’s and Don’ts) te chu Deparment ten an neih ang apiang DC Office-ah thehlutin mipui ten an tangkaipui theihna turin thehdarh a ni dawn bawk a ni.
Chhiatna a thlenin mipuiin rang taka thuneitute an biakpawh theihna tur Cell Phone No. 8119978919 leh Landline number 1077 te chu englai pawha biak theih reng an ni tih he hunah hian tarlan a ni bawk a. Serchhip District Hospital Casualty pawh mipui mamawhtute tan eng lai pawha biakpawh theih an nih thu sawi lan a ni bawk.
Comments
Post a Comment