Hectare 100-a zau-ah Rubber chin thar tum a ni
Nimin khan Serchhip DC Meeeting Hall-ah District Bawrhsap Paul L. Khuma hovin Chief Minister’s Rubber Mission chungchang hi sawiho a ni a, Bawrhsap chuan sawrkar Scheme thar Chief Minister’s Rubber Mission chungchanga hmalak dan tur leh a kalpui dan tura Stakeholder te inkohkhawm a nih thu sawiin, State Level-ah chuan December ni 16, 2024-ah he hmalakna hi hawn a ni tawh tih a sawi. He thutkhawm a tel te hian Chief Minister’s Rubber Mission hnuaiah hian Serchhip District-a ram hectare 100 a zauah Rubber hi chin phawt nise tiin ruahmanna an siam chhin a. Kumin October thla chhungin beneficiary turte thlang felin November thlaah a hmun tur vah fai tir a ni anga, senso zawng zawng sawrkar atanga pek tur niin, sum hi NABARD atanga hmuh a ni dawn a ni.
Chief Minister’s Rubber Mission keng-kawh turin District Level-ah Deputy Commissioner chu Chairman a ni a; District Officer, LR,S&W chu Member Secretary niin Member turte hi Project Director DRDO, District Agriculture Officer, District Horticulture Officer, Divisional Forest Officer, District Cooperative Officer leh Range Officer, LR,S&W te bakah Rubber Producers Society atangin mi pahnih te an ni.
Serchhip Mat ruam-a Zuangleng leh Zawlpui-ah rubber hi chin mek a ni a. A hlui lo nei tawh sa cheithatna tur ni lovin a thar hlaka hmalakna tur a ni dawn a. Ching ve duh satliah mai ni lo, tui tak takte hmalakna tur ni thei se tiin District Officer LR,S&W C. Lalthazuala chuan a sawi a ni.
Comments
Post a Comment