Govt. Serchhip College SU te lungawi lo in Vawiin-ah College Campus kawngpui dan an tum
Govt. Serchhip College Students’ Union te hian nimin tlai khan Serchhip Press Club-ah thuthar thehdarhtute kawmin tunhnaia an College a zirtirtu sawnchhuah chungchanga an lungawi lohna hrang hrangte an sawi a, heng an lungawi lohna te hi sawrkar thuneitute hnenah pawh an lo thlen tawh thin thu sawiin, tun thlenga a hlawhtlinna an la hmuh loh avangin tukin dar 9:00 atang hian an College Campus paltlangtu Vantlang kawng chu tiamchin awm lova dan an tum thu an sawi a ni.
Govt. Serchhip College SC Leader te chuan kumin February 17 khan Chief Minister leh Bialtu MLA Lalduhoma chuan mipui hmaa a thu sawi ah Govt. Serchhip College a Zirtirtu dah belh a tiam nia sawiin, “Hemi ni hian Chief Minister hian Geography Department-ah a nghet pahnih, Zoology Department-ah a nghet pakhat leh nghet lo pakhat leh BCA Department-ah a nghet lo pakhat pek min tiam a ni,” an ti a, hei hi tun thlenga tih hlawhtlin ala nih loh thu leh hriatthiam harsa an tih thu sawiin, “Chief Minister intiamna hi a rang thei ang ber a tihhlawhtlin anih theih nan Minister i/c Higher & Technical Education hian hma min lak sak rawh se,” an ti a. He huna an tarlan danin Govt. Serchhip College hian Geography-ah Zirtirtu pali neiin Regular pakhat, RUSA hnuaiah pakhat leh Casual pahnih niin College hrang hrang zingah Zirtirtu nei tlem ber zingah an tel a. Zoology-ah Regular pahnih leh Casual pakhat neiin Zirtirtu nei tlem ber zingah an tel bawk a. BCA-ah pawh Regular pakhat leh Contract-a thawk pahnih neiin College hrang hrang zingah thawktu nei tlem ber zingah an tel thu an sawi bawk a ni.
Tun dinhmunah Govt. Serchhip College-ah Department pathum- Physics, Chemistry leh Geography-ah te Sanctioned post pahnih theuh chauh a awm nia sawi bawkin, “Contract a thawk dah ngheh an nihin sanctioned post tlem avangin loh theih loh in College dangah sawnchhuah an ni thin a, he kan harsatna kumhlun hi chinfel anih theih nan heng Department pathum ah hian Sanctioned post pahnih theuh sawrkar hian min pek belh rawh se,” an ti a. Department paruk – BCA, Mathematics, Zoology, Botany, Education leh Economics-ah te Sanctioned post pathum theuh an nei tih pawh sawiin, heng Department-ah hian a lo ber ah sanctioned post pakhat theuh pek belh an phut thu an sawi bawk a ni.
Govt. Serchhip College SU te chuan tunhnai kum ruk chhung hian an College atangin Zirtirtu nghet (regular) mi 13 sawnchhuah an ni tawh tih sawiin, an aiawh turin Casual mi 14 pek an nih thu leh Mizoram College-a Casual Teacher ngah ber an ni tih an sawi a. Zirtirtu a nghet sawnchhuah anih in an aiawh turin Casual ni lo, a nghet ngei pek an phut thu an sawi a, Casual Teacher hrim hrim chu an duh lo a ni lo tih erawh sawiin, Casual Teacher te hian hna nghet an hmuh in an chhuahsan leh zel avangin zirlai ten harsatna an tawh thin thu an sawi a ni.
Hei bakah hian PM USHA hnuaia ‘Grants to Strengthen Colleges’ la dawng lo leh Focus District a la puan ve loh Mizoram District 5-ah ala awm thu sawiin, heng zingah hian Serchhip College chauh hi Multi-disciplinary College (Arts, Science leh BCA awm vek na) awmchhun a nih thu leh infrastructure a pachhe ber an nih thu an sawi bawk.
He huna tarlan a nih danin Govt. Serchhip College-ah hian Zirtirtu a nghet (regular) mi 21 an awm mek a, a nghet lo (Contract, RUSA, Part-Time leh Casual) mi 31 an awm mek bawk a, a nghet aiin a nghet lo hi mi 10 zetin an tam zawk a ni.
Comments
Post a Comment