Police te nun uluk turin chah

Home Minister K. Sapdanga chuan Police Department chu mipui venghim tur leh thlamuantu tur an nih angin mipui thlamuanpui tlak a nun uluk a pawimawh thu a sawi.

Police Conference 2025 kharna hun nimin-a Multipurpose Hall, PHQ, Khatla-a neih a hmanpuina ah Home Minister K. Sapdanga chuan Police Department chu mipui venghim tur leh thlamuantu tur an nih angin mipui thlamuanpui tlak a nun uluk a pawimawh thu sawiin, ruihhlo laka fihlim tur leh taksa hriselna ngai pawimawh turin a chah a. ‘Train to Excel’ tih thupui chawinung a, taksa sawizawi uar tur leh ei leh in te uluk turin kalkhawmte a chah bawk a ni. Home Minister chuan Police Department-a thawktu indaih-lohna leh Department building tlabal leh thawm-that ngai engemaw zat awmte chu theih ang anga hmalakna kalpui a nih thu a sawi a. Constable 295 lakna tur Physical Fitness Test pawh tluang tak a kalpui a nih thu tarlangin, Exam la awm turte pawh dik leh langtlang tak a buatsaih tum a nih thu a sawi a. Hna lak belh kawngah hmalak mek a nih rualin mahni duty tta tak a hlenchhuak thei tura a thawksa te thiamna leh theihna tuihriam pawh thil pawimawh tak a nih thu a sawi a. Thawk thei lo hlawh pek reng chu Sawrkar phurrit a nih avangin mahni mawhphurhna hlenchhuak thei lo sawrkar hnathawk an awm leh awm loh zirchiang a, chutiang mi an awm a nih chuan Mizoram Special Voluntary Retirement Scheme 2024 emaw, Periodical Review of Government Employees under Fundamental Rules 56 dan tlawhchhan a chawlhtir an nih tur thu a sawi bawk.

Home Minister chuan ram venghim tura hna dil kan ni tih hriat reng a pawimawh thu leh hna avanga insawn hi kan hna ken tel a ni tih hriatchian a tul thu sawiin, hnain a ken tel hamthatna hrang hrang bak thil dang it lo turin Police-te a chah a. Mizoram Police zingah mahni duty pel a khaw-tlang tan a inpekna thuk tak nen a hna thawk thin mi thahnem tak an awm chu fakawm a tih thu a sawi bawk.