Serchhip Bial-ah khaw 2 rinlut tura hmalak an rel

Vantawng Group YMA Inkhawmpui neih mek chuan Zote South leh Kanghmun South te chu Serchhip Constituency-a rinluh a nih theih nan hmalak nise an ti.
Serchhip Sub-Hqrs. hnuaia awm Vantawng Group YMA Inkhawmpui vawi 26-na hi Buangpui khuaa Tuirihiau Run-ah neih mek niin nimin khan Rorel Inkhawm neih a ni a, nimin khan an President C. Lalnunthara kaih-hruaia rorel Inkhawm neiin an Group YMA-a tel Zote South leh Kanghmun South khua te chu Serchhip Assembly Constituency-a rinluh a nih theih nana hmalak an rel a. Heng khaw pahnih te hi Lunglei District a awm thin niin Mizoram District ramri rin that a nih khan Serchhip District-a awm an duh angin rinluh an lo ni tawh a ni. Hei bakah hian Thenzawl chu P&E leh PHE Department-a SDO thuthmun an nih theih nan leh Thenzawl-a Civil Supply Office-ah Ration Card tih dik hna a thawh ve theih nana hmalak te an rel a. YMA lam kaihhnawihah Faina lama intihsiak neih te, ILP a nihna tur anga hman leh hman loh enfiah bakah Thenzawl-ah College din a ngei theih nana hmalak rawtna te chu an pass bawk a ni.

Vantawng Group YMA Inkhawmpui ah hian kum 2025-2027 chhunga an hruaitu tur thlanna nei nghalin hruaitu thlan zingah President-ah C. Lalnunthara (Thenzawl) leh Secretary-ah Samuel Lalrinpuia (Thenzawl) te an tel a ni.