SAFF inkhawmpuiah Mizoram Sports Minister a tel

South Asian Football Federation (SAFF) inkhawmpui, SAFF Extraordinary Congress chu nimin khan Sri Lanka khawpui Colombo-a Shangrila Hotel-a neih a ni a, he hunah hian India aiawhin Mizoram Sports & Youth Services Minister Lalnghinglova Hmar chu a tel a, All India Football Federation (AIFF) Executive Committee Member a nih bakah Asian Football Confederation hnuaiah Social Responsibility Committee-ah member nilai a ni bawk.

He inkhawmpui-ah hian Asia Chhimchhak ram pasarih - Bangladesh, Bhutan, India, Maldives, Nepal, Pakistan leh Sri Lanka aiawh palaite an tel a, Asian Football Confederation President Shaikh Salman bin Ebrahim Al Khalifa chuan he hun hi hmanpuiin thu a sawi a, SAFF member-te inpumkhatna leh thawhona tha a tih thu sawiin, duhsakna a hlan nghal a ni.

He Inkhawmpui zawh hnu hian Sports Minister Lalmnghinglova Hmar leh AFC President Shaikh Salman bin Ebrahim Al Khalifa te hi a hranpaa inkawmin India ram, a bikin hmarchhak in Football lama hma a sawn theihna tura rawtna a neihte Sports Minister hian a hrilh a; Indian Football hrechiang turin India a tlawh leh hunah Football tuichilhna hmarchhak State te tlawh tel turin a sawm bawk a ni. Tourism Minister ni bawk Lalnghinglova Hmar hian AFC President hnenah Mizoram chu ram mawi leh nuam, India ram hmun dang a tlawh tawhte nena inang lo tak a nih avangin a hmuna tlawh turin a sawm nghal bawk a ni.