Lengpui Airport chungchanga hmalakna chawlhsan rih

Indian Air Force (IAF) kuta Lengpui Airport hlan tura hmalakna a chawl rih nia thudawn a ni a, Working Committee pawhin Draft Memorandum of Agreement (MoA) an la ennawn leh lo nia thudawn a ni.

Zalen thudawn danin, ‘Working Committee to Look Into the Maintenance & Management of Lengpui Airport’-in IAF kuta airport hlan turin thui tak hma an la tawh a, Draft MoA an siam chu an peihfel hunah Cabinet a thehluh tur a ni a. Hetihlai hian Working Committee-in Draft MoA an duan hi an la ennawn leh lo tih an Chairman, TBC. Lalvenchhunga chuan a sawi a ni.

Tarlan tawh angin Working Committee to Look Into the Maintenance & Management of Lengpui Airport chu TBC Lalvenchhunga, MLA & Adviser to the Chief Minister, Mizoram (Finance & Planning) kaihhruaina hnuaiah November 18, 2024-ah din leh a ni a. Committee hi IAF hnena Lengpui Airport hlan chungchang zirchianga Draft MoA buatsaih tura sawrkar din a ni a. Hetihlai hian March 15, 2025 khan NGO Co-ordination Comittee (NGOCC)-a tel pawl hrang hrang - Central YMA, MHIP leh MZP hruaitute chuan Mizoram tlawha zin, Union Home Minister Amit Shah chu Raj Bhavan-ah hmuin an ngaihpawimawh thil chi hrang hrang an sawipui a. Heng zingah hian Lengpui Airport tihchangtlunna tur sum ruahmansak tur leh tichangtlunna tura ruahmanna siam turin an ngen a. Union Home Minister hian Airport chu tihchangtlun a duh thu leh a ngaih pawimawh thu sawiin, Airport Authority of India (AAI)-in a buaipui tur thu a lo sawi a. Thla thum chhungin AAI hian thil tul zawng zawng an buaipui ang a, thla ruk chhungin tihchangtlun hna an thawh tan tur thu a sawi a ni.

Hetihlai hian Lengpui Airport chu Union Home Minister Amit Shah-a'n Airports Authority of India (AAI) kuta dah a nih tur thu a sawi chu chaktaka um zui turin Lengpui Airport Forum chuan sorkar a ngen a. Lengpui Airport Forum hi Inrinni khan Aizawl-ah thukhawmin, an duh ang ngeia AAI-in Lengpui Airport an la tur anga thil a awm ta chu lawmawm an tih thu an sawi a. Hemi chungchanga NGOCC-in theihtawp chhuaha hma an lo lak tawhna te leh Airport Forum-in hma an lo lak tawhna lo thlawptu zirlai pawl, pawl hrang hrangte leh Mizo mipui chungah thinlung takin lawmthu an sawi a. Lengpui Airport chungchanga Home Minister tawngkam hi chak taka umzui turin sawrkar chu an ngen a, State tana tha tur leh an duh dante pawh sawrkar laipuia thlenna remchang ah la turin a ngen a ni. Lengpui Airport Forum chuan hemi chungchangah hian Union Home Minister leh Chief Minister te hma la zui tura ngenna a thawn dawn tih an sawi bawk a ni.