Education Minister in mi pawimawhte a kawm

New Delhi-a cham mek Education Minister Dr. Vanlalthlana chuan DoNER Minister Jyotiraditya Scindia leh DoNER Secretary Chanchal Kumar te chu a an pisa-ah tlawhin, Mizoram hmasawn nana pawimawh hrang hrangte a sawipui.

DoNER Minister nen an inkawmna ah hian Dr. Vanlalthlana chuan Mizoram hmasawn nana pawimawh hrang hrangte leh mamawhte thlenin, hmalak tulte a sawipui a. DoNER Minister chu Mizoram hmasawn nana theihtawp chhuaha tawiawm tura sawmin, zirlai naupangte'n mahni intodelhna kawnga ke an pen theih nana pawimawhte a thlen bawk. 

Education Minister hian Niti Aayog Member Dr. VK Paul hmuin Mizorama zirna leh technology tihhmasawn dan tur chungchang an sawidun a, An sawidun langsar zingah Mizoram tana Education Conclave nei tura rawtna awm chungchang chu telin, Dr. Vanlalthlana chuan he hmalakna hi Mizoram zirna ruangam enfiah nana neih a tul thu leh hmasawn ngaihna lai, a bikin ziak leh chhiar thiam tam nihna chu rampum huap exam-a tih that nan leh hnathawka rawih tlak tam zawk chherchhuah nan Education Conclave chu hmanraw tangkai tak a nih dawn thu a sawi a. NITI Aayog Member chuan he hmalakna hi phurawm tiin, State Support Mission (SSM) kaltlanga puih an inhuam a ni. 

He hunah hian Education Minister chuan Secondary leh Higher Secondary zirlaite'n Financial Literacy leh thiamthil zirna kaltlanga mahni kutkawih intodelh tumna thinlung an put theihna tura hmalakna 'Project Intodelh' chungchang a tarlang a. NITI Aayog chuan pawl 3 leh pawl 6 te tana Random Examination 2024-25 neih atanga State Report Card an hnena thehluh chu Best Practice Document-ah an pawm a ni.